Tuesday, May 24, 2005

كويلهو عندنا .. يا مرحبا

لسة راجعة حالا من عند باولو كويلهو ..
دماغي وزنها 2 طن ونص، وهدومي بقت زي الطين-بذكائي الشديد لبست البنطلون الأبـ .. اللي كان أبيض الله يرحمه، من الساعة سبعة الصبح لـ11 بالليل. سيبكم من إني مانمتش إمبارح غير عدد 3 ساعات فقط لا غير. ومع ذلك مسكت الورقة والقلم - بالعند في الصداع اللي في أم رأسي دلوقت- وأديني باشخبط ع الورق أهوه.

النهاردة يوم جدير بالاحتفال، مش لإني شفت باولو كويلهو وسمعته وحسيته وبس. لأ.. لإني أخيرا عملت حاجة مختلفة.. وعرفت أسرقني بشكل مختلف مالهوش علاقة بالشيكولاتة ولا بالعيال العكاريت اللي حكيت لكم عنهم. أيوة .. طعم جديد للتمرد .. وشعور جميل بإني –بحضوري اللقاء ده- باعمل حاجة لغادة البني آدمة اللي عندها نيه في الحياة مش بطالة أبدا. بيني وبينكم باحبني وأنا متمردة! وباعشق الخصلة السودا اللي بتنط من تحت الحجاب وبتقول لي "أنا هنا .. ماتنسينيش".. وبيجي في بالي دايما الوقفة المشهورة لبطلات الكارتون في آخر كل فيلم .. شموخ وشعر مفرود وضروري طبعا شوية هوا يطيَّر خصل الشعر..ونظرة تحدي في العينين..

ماعلينا .. خلينا في عم باولو ...
كنت بادور عليه بجنون، وماكنتش عارفة أوصل له. كنت عارفة إن "ساحر الصحراء" أو "السيميائي" هي واحدة من الـ
Must reads
لأي حد مهتم بالأدب. صديق عزيز تبرع وقام بدور بابا نويل وجابهولي كده من غير مناسبة .. اللهم إلا لإني ذكرت عم باولو في وسط الكلام مرة زمااااان. (احم .. الناس دي بتحسسني بالدونية!)

تفاعلت مع "فيرونيكا" لدرجة البُكا، ولحد دلوقت شايفاها أنضج وأعمق وأثرى وأجمل من بكتير من "السيميائي". يمكن ده لإني حسيت إن في "السيميائي" الفكرة طاغية على الحدث الدرامي .. أو السرد شوية تقليدي عشان يوسع مكان للفكرة ..اللي هي البحث عن الأسطورة الذاتية وتحقيقها.. مش عارفة الحقيقة. لكن –وده اللي ما يصحش أني أنكره- الراجل ده من الناس اللي دخلوا في تكويني.

وعشان كده –وعشان هو "باولو كويلهو" أصلا- ماتخيلتش إني ممكن أكون معاه تحت سقف واحد –أو بالأحرى كوبري واحد- ويفصلني عنه كام متر وكام راس بني آدم! لأ والأدهي إنه يطلع شبهنا كده، بجسمه الصغير وتي-شيرته الأسود النص كم اللي أصبح مرتبط بصورته دايما، وروحه اللي كانت بتعدي بين الكراسي وبتحضن كل واحد فينا.

الراجل ده أهله حطوه في مستشفى مجانين، عشان كانوا عاوزينه يطلع مهندس "فالح"! اللي ما تخيلتوش فعلا، إنه يتكلم عنهم وعن التجربة بالسماحة دي والتصالح ده اللي خلاني أحتقر نفسي..

عمري ما هنساه وهو بيقول..
I know that they did it for love!
أهله حطوه في المستشفى 3 سنين عشان بيحبوه! .. يااااه .. بالذمة فيه ناس كده؟ وفيه رحابة وضحكة زي دي؟!

كنت شبه المنومة مغناطيسيا طول القعدة ..
سحر الموجي كانت هناك والبت مروة وخالد وعلي سلامة اللي بيكتب أغاني لـ"وجيه عزيز" .. انضميت ليهم بعد باولو ما خلص .. ومانسيتش أخد نفس جامد من المكان العبقري اللي ع النيل ده قبل ما أمشي.

دلوقت أنا نعسانة مووت، وشوية حاجات عمالة تعوم قدام عيني..
· كويلهو قال "إحنا بنفتكر دايما إن العبقري هو اللي بيكتب ومحدش بيفهمه!"
· الصور اللي ع الحيطان كانت تحفة..
· سحر لسه حضنها واسع..
· مروة لسه مجنونة..
· ياااااه .. أنا محتاجة أطول بجد!

أوزو مستنيني .. تصبحوا على خير..

18 comments:

محمد هشام عبيه said...

كالعادة حضرت لقاء ذلك الكويلهو متأخرا لكني ظفرت بجيوش البنات الفاتنات اللائي حضرنا هذا اللقاءبملابس سهرة رائعةجدا جدا لشاب أعزب مثلي! ، أول مرة أعرف أن البنات مثقفات كده ..ولايمكن هي المنظرة المتأصلة بداخلهم التي تجعلهم يهتمون بالمكياج وارد إيطاليا وكويلهو وراد البرازيل..جايز أنا عنصري وفقري بس ده رأيي في معظم البنات اللائي حضرن اللقاء- وبالطبع هذا الرأي لاعلاقة لك به ياغادة!-
بس حقيقة برافو على قلمك ..نجحت- في براعة -كالمعتاد في أن تقلي لدي نفس الحالة الفريدة ونفس الشعور بالنشوة رغم إني لم أر كويلهو..صباح البن..والأدب البرازيلي!

Aladdin said...

ذهبت إلى ندوة كويلو (وليس كويلهو يا غادة) .. استمتعت بروح الرجل البسيط الفيلسوف. العتب على عمر في عدم لقائي بدايرة بص وطل الكرام - باعتباري "جرنالجي" على حد تعبير عمر! على العموم الجايات أكتر من الرايحات.

في انتظار الرد.

نعناعة said...

وانت من أهلة :)
مممم بقى كنت هناك ... الغريبه ما لمحتكيش خالص :) رغم اى جيت متاخره بس كنت اكيد هاعرفك حجاب وبنطلون كان ابيض ..

كويلهو جميل وساحر الصحراء رائعة بعدها كنت حاسة بطاقة غريبه بتملانى كنت مفتونه بفاطمه .. فيرونكا بيلعب فيها على نفس الفكره بس فى جو مختلف هى خيبت ظنى شويه خصوصا انى كنت متوقعة ان المريضه التى تنفصل عنها روحها بشكل مؤقت ستلعب دورا أكبر في الحدوته ...

لكن ايه الزحمه دى أصحابى قالولى انهم كانو دايرين وراه من قبلها بيوم ندوه كليه اقتصاد وبعدين دار الشروق وبعدين الساقية

من جديد احب ما تكتبين ..
"بيني وبينكم باحبني وأنا متمردة! وباعشق الخصلة السودا اللي بتنط من تحت الحجاب وبتقول لي "أنا هنا .. ماتنسينيش".. وبيجي في بالي دايما الوقفة المشهورة لبطلات الكارتون في آخر كل فيلم .. شموخ وشعر مفرود وضروري طبعا شوية هوا يطيَّر خصل الشعر..ونظرة تحدي في العينين"

:) أحنا نعرف بعض قبل كدة ؟

Ghada said...

محمد: واضح إنت مش إنت لوحدك اللي اتأثرت .. أنا كمان أعصابي تعبت الحقيقة .. احم .. بهزر أكيد ..بلاش كلام فارغ! ..
:)

علاء الدين: كويلهو كويلو كويليهو كويليو .. المهم إنه هو ده الراجل اللي أنا شفته في الساقية واداني شوية inspiration
كنت محتاجاهم قوي .. بالمناسبة .. اسمه مكتوب "كويلهو" على غلاف الكتابين اللي له عندي .. آه .. قريت النسخ المترجمة.

دايرة بص وطل الكرام ما كانوش موجودين .. أنا رحت بشكل فردي "مع نفسي" كده .. بعدها محمد هشام وصل على الأواخر ولم أره أنا شخصيا..
أعتقد إن حماسة أبناء الدايرة الكرام للسراير كانت أكتر من حماستهم لعم باولو..معذورين ..
:D

نعنع: الدنيا كانت زحمة فعلا والعدد كان ف اللمون .. جميل إن كل الناس دي تبقى مهتمة .. بغض النظر عن أي حاجة تانية! احم

مش عارفة يا نعنع بس فيرونيكا لما عرفت إنها هتموت، قربت من روحها واكتشفت ذاتها وعرفتها.. زي ما تقولي كده الراوية تصوير لمقولة
اعمل لدنياك كأنك تعيش أبدا
معاكي طبعا إن السيميائي ملهمة ..بس فيرونيكا أقرب لي ..

أكيد يا نعنع إحنا نعرف بعض .. اتقابلنا في ميدان النعناع من زمااان .. ولا نسيتي؟
:)

Dido's^^^ said...

لم أقرأ لبــاولو كويلو غير ســاحر الصحراء مترجمة لبهاء طـــاهر ... و عندي تحفظات كثيرة علي الرواية و الخيال الزائد فيها !! مش عارفة اتعايش معاها

المهم أنا برضه كان نفسي أروح أشوف باولو و هو بيتكلم ... للأسف لم يسعفني الحظ
I missed it ba2a .. waaaaaaaaaaa

Ghada said...

ماتزعليش نفسك يا ديدو .. قريب هاعمل تغطية للموضوع بالتفصيل الممل .. أصله قال كلام ما ينفعش يتفوت الحقيقة .. ربنا يسهل
انتظرونا بس
:):)

Aladdin said...

واضح ان مود "التصحيح" زودها اوي معايا! لي صديقي حميم يتحدث البرتغالية وقرأ "كويلو" بلغته الأم (يا بخته!) قال لي هذا الصديق إن ترجمة بهاء طاهر (رغم إعجابي بالرجل كروائي) رديئة لأنها ترجمة وسيطة (أي من البرتغالية إلى الإنجليزية ومنها إلى العربية) وهذا أدى إلى فقدان النص الأصلي للكثير.. أضاف هذا الصديق أن الترجمة مليئة بالأخطاء من بينها الخطأ الفادح في اسم الكاتب نفسه (لا يعرف بهاء طاهر أن حرف h صامت في البرتغالية)!!!! أخويا الباشكاتب (الذي يعرف الأسبانية) أكد لي نفس كلام صديقي بالنسبة للأسبانية أيضا - بصراحة اللقاء كان جميل رغم الزحام من أنصاف المثقفين و"المثقفات" -على رأي محمد هشام - ظني أن عددا كبيرا من هؤلاء كانوا (طلبة جامعة أمريكية)

بس هما يتحدوا على اسم الراجل!!! (مرة كويلو ومرة كويليو وكويللو وكويلهو!!)

Ghada said...

أنا كمان حسيت إن ترجمة بهاء طاهر فيها حاجة لما كويلهو قال إنه ذكر الـ
signs
مرة واحدة في فقرة واحدة
وأنا فاكرة إني قريت كلمة العلامات دي حوالي 17 ألف مرة ونص في النسخة المترجمة
!

أعتقدت أنا الأخري في الغزو الـ
AUCian
للمكان .. الأمسية كانت رائعة برغم قلة الملابس!
:)

freedom said...

كالعادة
أنت
متألقة


guevara75.blogspot

MS said...

مساء الخير
الاخت غادة تحية طيبة من عروس البحر الى ام الدنيا مصر ....حقيقي انا غبطتك كتير عشان اللقاء دا ..ويابختك ياست عموماً كلماتك الجميلة عن اللقاء كانت مميزة وعشت معها لحظات حلوة وهو راجل يتحب من اول قراءة (الخيميائي وغيرها من رواياته سحرتني تماما )ارجو ان ارى المزيد من تداعيات هذا اللقاء واصداءه مكتوبه هنا لاني بصراحة ادمنت البلوغ الحلو دا .....
تحياتي

Ghada said...

Freedom:
أشكرك بشدة وبعنف.

أ. ممدوح:
سعيدة جدا بمرورك .. سلامي لك من مصر المحروسة.. إن شاء الله سأضع المزيد عن انطباعاتي والمزيد عن كويلهو والمزيد عن أي شيء آخر ! تابعونا على
ma3nafsi
مش هتقدر تغمض عنيك!

Shamoussa said...

I was there too.. and a lot of bloggers I never met in person before! He is quite inspiring, too bad I couldn't get the book I had autographed.. but I can understand he couldn't have signed for all these people! Believe it or not.. I didn't notice at all who was wearing what.. I had a cold and it kept me quite busy!

rana said...

غادة ياريت تكوني عند وعدك في تغطية تفاصيل اللقاء بصورة أكبر ... أنا من عاشقات الرجل ده وصوفيته الواضحة في رواية السيميائي ... تحياتي ليكي قوي قوي وللجميع
رنــــا

Ghada said...

have jusy noticed ur comment shamoussa..guess u got rid of ur cold by now! :) keep me posted ..

رنا: إن شاء الله التغطية اللي وعدتكم بيها هتنزل .. أنا مش بانسى
:)

moony_sweety said...

فى عسل كده؟بجد انتى عسولة قوى جدا خالص.
انتى ومدونتك ودنيتك اللى بتحكى عنها حاجة جميييييييييلة جدا حصلتلى فى حياتى

Anonymous said...

You have an outstanding good and well structured site. I enjoyed browsing through it »

Anonymous said...

福~
「朵
語‧,最一件事,就。好,你西...............................................................................................................................-...相互
,以讓>它使...................

Räumung said...

موفقيييييييييين .... اختيار موفق :)

Räumung
Räumung Wien
entsorgung wien