Wednesday, September 28, 2005

نفسي أحضنه بس خايفة أتعور!



من حوالي 12 سنة كده ولا يمكن أكتر، لما بقيت كبيرة ماينفعش ألعب مع العيال بالعرايس والدباديب، محدش جابلي فانوس. ولما كنت بطالب بحقي الدستوري في الفانوس في العيلة، ماكنتش بالاقي رد فعل غير الضحك بسخرية و "أحمدك يا رب بنتي اتجننت!".

السنة اللي فاتت أميرة جابت لي الفانوس
ده، وكنت مبسوطة جدا وقعدت ألعب بيه في المكتب وأعمل كل الدوشة اللي أنا عاوزاها بيه. كان فانوس بلاستيك محندق وقمور قوي، وبيغني كمان. فكرة الفانوس في حد ذاتها بتربطني بسنين ورا..بسنين خضرا ومدهشة.. فيها المعاني كانت لسه بشوكها مستنية اللي يفك الورق السوليفان من عليها. دايما الفانوس بيفكرني بتجمع عيال العيلة في المشاية اللي في بيت خالتي ..بأكياس شمع ملون كتييرة قوي، وعلب كبريت. ننور الشمع ونتلسع لما يسيح على إيدينا ونلسع بعض (قمة السادية يعني!). ولإن بيت خالتي ده بيت عيلة جوزها، فكنا بنتعرف على عيال تانيين هناك.. في المشاية وتحت نور الفوانيس.

وطبعا كنا بنتباهى، ونشوف فانوس مين الأحلى.. وفانوس مين اللي بينور أكتر وفانوس مين اللي طلع خربان وصفيح القاعدة بتاعته اتفكك من بعضه. كانت تركيبة عجيبة.. ضحك وجري على صريخ وعياط وغيظ. شوية مشاعر الواحد ماعدش بيحسها كتير بنفس الدرجة زي زمان. يعني.. تقدروا تقولوا كده إن الفانوس بالنسبة لي أكتر بكتير من مجرد هيكل صفيح بينور وخلاص.

السنة دي بقى.. والنهاردة تحديدا، لقيت المفاجأة دي!



أيوة فانوس .. وصفيح كمان (مش باحب البلاستيك قوي) وكبييييييييييييير خالص. وبتاعي أنا لوحدي ي ي ي ي! هدية غاية في الروعة من أميرة وإيمان زمايلي وصحابي في الشغل اللي بيعاملوني كأني لسه صغيرة، وبيدلعوني ع الآخر.من كتر ما أنا مبسوطة بالفانوس نفسي أحضنه بس خايفة أتعور! كل سنة وإنتم طيبين!

17 comments:

Amira said...

من أكتر الحاجات اللي بجد بتسعدني في الدنيا دي، لما الفرحة تملا عيونك الواسعة وأشوف اللمعة "إياها" فيها.. يا غدغود يا أحلى وأغلى حبة في العنقود ربنا يخليكي لينا دايماً ويسعد أيامك يارب.. وميرسي جداً على "التصييت"ده يا أستاذة

Doaa Samir said...

كل سنة وإنت طيبة يا غدغود ومبروك ع الفانوس... أنا باحب الفانوس الصفيح×الزجاج اللي عامل زي المعشق بس يكون بشمعة. لازم الشمعة
Pola,Pola
كانت اكتشاف عظيم النهاردة.. بس كان نفسي أحتفل بيها والفسحة خلصت عندنا في الشغل..من ساعة ما لقيتها عمالة أسمعها هي واخواتها "تووت تووت، ذهب الليل، ماما زمانها جاية، بس مش لاقية أنّا أنّا أنّا، إنّ إنّ إنّ، الشمس البرتقالي عليها لي سنة" بتاعة جدو عبدو
وأغنية تانية لعفاف راضي بتاعة الصبح وهنروح المدرسة وكده

معاذ رياض said...

يا خبر ، كل ده فانوس ! ما شاء الله اللهم لا حسد. بس ازاى دخلتوه الشركة الدولية لتكنولوجيا المعلومات ، هوه مفيش أمن ولا ايه ؟

mindonna said...

أغنية بولا بولا

كنت بحبها زمان ،فكرتيني بيها:)

بس صحابك عساسيل أوي علي فكرة..انهم يهدوكي فانوس

رمضان كريم:)

Ghada said...

ربنا يخليكي يا أميرة إنت وإيمان.. عمركم ما بتنسوني ومتبنينني على طول!
:))

دعاء:
وإنت طيبة يا دعاء..أكيد الفانوس الصفيح ده مالوش مثيل أصلا..زي أغاني زمان كده..:)

معاذ:
يا ساتر على القرررر..يا سيدي البنات هما اللي دخلوه..وبعدين الناس اللي في الشركة المفروض يتبسطوا..ده عامل جو جميل قوي..الأزمة إنه ماينفعش أنوره هناك عشان محتاج لمبة مش شمعة!

Mindonna:
وإنت طيبة يا جميلة..هما عساسيل فعلا..مدلعينني ع الآخر
:))

Tara said...

كل عام و انت بألف خير يا غدغود
ينعاد علكي رمضان وانتي بخير وصحة وسلامة
و مبروك ع الفانوس الجديد
و عقبال كل عام

Ghada said...

الله يبارك فيكي يا تارا..
رمضان كريم عليكي وعلى أهل العراق كلهم..
ربنا يحميكم ويطمننا عليكم
..
عقبال ما يجيلك فانوسك إنت كمان
:))

Ahmed Shokeir said...

أخر الأخبار

القاهرة تنفق 30 مليون دولار. لاستيراد فانوس رمضان الصيني سنويا.

بس بصراحه فانوسك يكسب

bosbos said...

كل سنه وانتو طيبين جميعا
انا كمان يا غاده بموووووت في الفوانيس و كل سنه افضل ازن و اعمل مظاهرات في البيت لجد ما يجيبولي فانوس جديد زي العيال الصغيره

Zeryab said...

كل سنة وانتى طيبة يا ست غادة ..ربنا ما يكسرلك فانوس يارب

Moia said...

كل سنه وانتى طيبه يا غاده وياااارب يخليليك اصحابك وكا الناس اللى بيحبوكى حواليكى ويغرقوكى فوانيس دايما عشان تفضلى فرحانه على طول يا رب

ميشيل حنا said...

كل سنة وانت طيبة.
يا سلام لو يعملوا فانوس باليو إس بي، كان ممكن تنوريه من الكمبيوتر!

santakarim said...

ايه ده ؟ انتى بتشتغلى فين ؟ انا عارف المكاتب دى ؟ زى مكتبى القديم
يمكن صدفة
عموماٌ تسقط الفوانيس البلاستيك

Ghada said...

أحمد:
الأزمة الحقيقية إني مش عارفة آخد الفانوس لحد دلوقت البيت!

بسبس:
واضح إن كل البنات بتحب الفوانيس
:))

زرياب:
وإنت كمان ربنا ينور لك كل فوانيسك
:)

m:
كفاية علي دعوتك دي.. حاساها طالعة من القلب.. ربنا يخليكي

ميشيل:
الحاجات دي بيبقى ليها طعم تاني بعيدا عن الأسلاك والتكنولوجيا اللي هتجننا دي!

santakarim:
المكاتب دي في كل حتة يا بني.. ماعتقدش إنك اشتغلت هنا قبل كده، لإني كنت هنا من البداية.. عموما كله تقفيل "موبيكا" يعني!

Anonymous said...

best regards, nice info Mitsubishi eclipse gst weight Butalbital fioricet in fioricet Truck rental in dover nj new jersey piece of crap Chevrolet trailblazer metallic green Portable table top dishwasher Dc western shirts hosting provider neurontin withdrawal online degree Scooby car cover buy didrex Jewelry packaging supply Laptop curser moving on own Canadian didrex prescription Wire wrapped gold hoop earrings watches Avg virus protection free addition Cartoon s on attorney and their paralegal staff Iden ringtones

shereen said...

كل سنة وأنتِ طيبة
جميل كلامك بحسه بيقول أد ايه الفانوس له قيمة معنوية تانية يمكن اللي حوالينا بيحس إنه جنان حد كبير يدور على فانوس يمسكه ويفضل يبص له كتير ويقلب فيه وهو فرحان ولا أكنه طفل صغير... بس الفانوس ده معاني جميلة..دفا ولمة وحرية ورمز ثابت لدنيا حلوة مكانش فيها لا فكر ولا هموم

Anonymous said...

福~
「朵
語‧,最一件事,就。好,你西...............................................................................................................................-...相互
,以讓>它使...................