Monday, June 27, 2005

أصداء كلامنا في المصري اليوم

دخلت مكتبنا العامر ولقيت زيطة وزمبليطة وهتافات وكلام كبير.. خير يا جماعة؟ المصري اليوم رصدت اللي بنحاول نعمله في "مصر مش كده" في مساحة راااائعة في الصفحة 11 وعملت تنوية عن الموضوع في الصفحة الأولى كمان..نصيحة؟ .. اشتروا العدد لإن أساميكم كلها وتعليقاتكم جاية في المحضر .. قصدي في المقال:)


(ده التنوية اللي في الصفحة الأولى)



(وده أول جزء من المقال .. حاطين البانر بتاعنا في الصفحة..خدتوا بالكم؟)

أعتقد يا جماعة إحنا مش محتاجين دفعة حماس أكتر من دي.. ولاّ إيه؟

Tuesday, June 21, 2005

مصر مش كده

من ردود الأفعال اللي جت على "البوست" اللي فات، فرض إعلان مصر "السياحي" جدا نفسه. الإعلان ببساطة، امتداد للإعلان الشهير بتاع "مصر .. البيت بيتك". باختصار الإعلان بيختصر مصر في التالي .. كام بيكيني .. على كام بدلة رقص .. معروضين بصورة أكتر من فجة. و هي دي مصر يا عبلة!

تعرفوا، مع إني مصرية أبا عن جد عن جد جد، إلا إن عمري ماكنت أعتقد إن مصر هي بلد البكيني والـ لاموخذة الرقص الشرقي وبس! حسيت إننا كلنا كده بربطة المعلم اتلزقنا على قفانا، وعلقنا يافطة بتقول

"..........".
!!
من غير كتر كلام، خلونا نفكر سوا في حل للإعلان المهين ده .. من ناحيتي، صممت البانر ده

fanta.psd



ومكان الصورة أهوه


لو حد يحب يحطه في البلوج الخاص بيه يعني. سموها حملة .. سموها أي حاجة بس خلونا نفكر بصوت عالي .. ممكن نعمل إيه؟

-----------------

خلوني أشكر كل الناس اللي اهتمت وعلقت على الموضوع .. وخلوني كمان أقدم لكم البلوج اللي دارت المناقشة حواليه في التعليقات

moshkeda.blogspot.com

كلنا هنقدر نتكلم هنا بحرية .. عن مصر اللي شايفنها .. وحاسينها .. وعاوزين الدنيا كلها تشوفها

اللي يحب يكون من المشاركين يبعتلي الإيميل الخاص بيه، عشان أبعت له دعوه .. وخلونا نعمل حاجة للبلد الطيبة اللي عايشين تحت ضلها دي

شكر خاص لـ بنت مصرية .. لحماسها ولمبادرتها بوضع البانر في صفحتها ولتشجيعها لي لعمل البلوج الجديد "مصر مش كده"

تحياتي ليكم نفر نفر

:)

Monday, June 13, 2005

وسلم لي على حقوق المرأة!



بقالي فترة كل ما أتكلم على إن الست لسه ليها حقوق لازم تاخدها ألاقي موجة من "أيوة جمعية المرأة المتوحشة اشتغلت" .. و"إيه يا ست الثورجية" و"دي الرجالة هي اللي بتطالب دلوقت بالمساواة مع المرأة".
جميل.. أنا ظالمة ومفترية ومتعصبة بشكل مرضي .. حد فيكو شاف ده بقى؟


لو حد فيكم اسعده حظه بإنه شاف الإعلان ده في الشارع .. أيوة..محطوط علانا جهارا كده في وضح النهار.. هيعرف أنا باتكلم على إيه.

بجد أنا "اتقرفت" من اليافطة دي..

سيبكم من موضوع استغلال صورة المرأة في الإعلانات .. سيبكم من الإعلانات اللي بتحترف التجارة (مش عاوزة أقول النخاسة) بصورة الست قبل المنتج .. سيبكم من إعلان الشيكولاتة أو الأيس كريم أو السيراميك اللي بيطلع لك واحدة جميلة فتروح تشتري السيراميك على أمل إنهم يدوهالك عليه هدية مثلا!

خلينا في الإعلان ده .. ولا مؤاخذة إيه المتعة الزايدة اللي المستهلك هيحس بيها، لما يشرب من إزازة شفايفها منفوخة؟!! .. لأ بجد يعني.. هل ده بيأثر في جودة المنتج في شيء؟ .. ولا الناس خلاص بقت أعصابها بايظة لدرجة بتتخيل أي حاجة إنها تبقى ست .. لأ وإيه .. ست بكتاف مدورة.. وبطن مشفوطة وتاتو كمان!


خلاص يا جماعة باعترف لكم إني سحبت عضويتي من "جميعة المرأة المتوحشة" و"جمعية المرأة مكسورة الجناح" كمان .. بس بالذمة بالذمة .. حد شاف إعلان مستفز أكتر من ده؟؟