Saturday, October 21, 2006

ماريـان


ماريـان

النهاردة بقى عندك 23 سنة.. فاكرة في أعياد الميلاد دي كنا بنعمل إيه؟ كنا ننتهز الفرصة عشان نكتب لبعض جوابات، مع إننا كنا بنشوف بعض كل يوم ونروَّح مع بعض كمان.. أنا فاكرة إن في عيد ميلادي الـ 19 قريت الجواب قبل حتى ما أبص على الهدية..

لما كنت بادور على حاجة أجيبهالك كنت محتارة.. تقليدي قوي إن البنات يجيبوا لبعض حاجات في الجهاز.. بس عارفة، عشان ماعدناش بنشوف بعض ولا بنكلم بعض كتير زي الاول، لقيت الفكرة دي عبقرية.. قريب إن شاء الله هتكون لينا بيوتنا المستقلة، وبالتالي عبقري جدا إننا نكون موجودين في بيوت بعض.. عبقري إنك تقفي في المطبخ في وسط اليوم فتشوفيني في حاجة صغيرة وتفتكري أي حاجة من ذكرياتنا وتبتسمي.. أنا عن نفسي متأكده إني هاعمل كده..

عارفة؟ ساعات كتير بالوم نفسي على قلة كلامنا دي.. بالوم نفسي لكل الفضفضات اللي باضطر ابلعها جوايا عشان إنتِ مش جنبي.. وبرضه باحس بغيرة جامدة لما أعرف إن بقى ليكي أصحاب جداد- مش زيي أنا عارفة بس برضه باغير!

لكن بارجع وأقول مش مهم.. مفيش حد فيهم عرف ماريان قدي.. محدش فيهم يعرف إفية "أم الحكيم" اللي كنا هننطرد بسببه من المدرج (هو كان 24 ساعتها؟).. محدش فيهم يعرف يوم الكشري الحراق والمطر.. محدش منهم عرف إبتسامة طنط سامية الله يرحمها.. ولا عمر قلبي اتخلع على حد من صحابي زي ما حصل لما عرفت بوفاتها بالدرجة دي.. يا بنتي محدش شاف نظارتك أم شنبر أسود عليكي.. ومحدش صلحالك لما اتكسرت غيري (بابقى فخورة بنفسي قوي لما بافتكر ده!)..

محدش يقدر يرغي معاكي كل الرغي اللي بنرغيه سوا.. ولا يفتح معاكي كل نوافير الكلام دي.. حتى لو بقالنا فترة بعاد، بنرجع نتكلم كإننا كنا مع بعض إمبارح، وبرضه بنروح زعلانين لإننا لسه ماخلصناش كلام..

مش هانسى أبدا إن أول كلامي عن فارس الأحلام كان معاكي..عند كلية سياسية واقتصاد.. فاكرة؟ كلمتيني عن أدهم صبري ونصحتك تقري رفعت إسماعيل (فاكرة ضحكنا قد إيه على اسمه أدهم؟).. وقعدنا نستشهد بأجزاء من الروايات.. ماجي ومنى.. كنا مبسوطين قوي يومها.. عمرنا ما تخيلنا إننا ممكن نقول العبط ده لحد، ويحسنا ويصدقنا زي ما عملنا مع بعض!

عارفة إن هيبقى شكلي زي العيال لما أقول لك الكلام ده، بس أنا بحبك قوي يا ماريان، وباحس إن ربنا بيحبني عشان رزقني بصديقة وأخت زيك.. وعارفة كويس إن ممكن ناس تعيش حياتها من غير ماتدوق طعم الصداقة الحقيقية اللي عرفت معناها معاكي.. الحمد لله..

ملحوظة على جنب: باكرر إنك كنتي زي القمر في نص الإكليل.. قولي لصفوت إن مش أي حد يستحق ماريان.. كل سنة وإبتسامتك في قلبك..

غادة
21 أكتوبر 2006

23 comments:

محمد هشام عبيه said...

فيه ناس كده الواحد بيبقى كفاية عليه أنه يكون عرفهم عن قرب في فترة من فترات حياته..الواحد بيكون سعيد بده لأن الناس الحلوة دي اعطته -دون أي فذلكة- حاجات كتير قوي وعلمته معاني هو كان نساها أو يمكن ماعرفهاش أصلا..زي البساطة والتلقائية والرقة والضحكة الصافية والحزن الشفاف..
ماريان تعتبر بالنسبة لي أول واحدة أقابلها من الصنف الفريد ده..
كل سنة وهي طيبة ..كل سنة وهي زي ماهي ..وميرسي ليك ياغادة عشان كنت سبب في إني أعرف حد "مش ممكن" كده زي ماريان- تقريبا ياغادة دي الحاجة الوحيدة الحلوة اللي عملتيها معايا!-
ويارب- واحنا في شهر رمضان ياماريان!-
يوفقك في كل خطوة في حياتك..ويزرقك أنت والجميل صفوت- خطبيها بالمناسبة- بكل الخير والجمال والأولاد الحلوة اللي تشبه لكم..قولوا آمين

Anonymous said...

كل سنة و هي طيبة

moony_sweety said...

أقولك ايه بس ياغادة؟!!!!!!!!ربنا وحده اللى يعلم اللى جوايا دلوقتى
يمكن عايزة اقولك نفس الجملة اللى بحس بيها لما بتكتبى عن نفسك او ناس من دنيتك الخاصة "بطلى تكتبى عن اللى جوايا"والله على ماأقول شهيد.

الصداقة كانت حلم حياتى وخصوصا صداقة زى اللى بتتكلمى عنها،والله زى كل حرف كتبتيه،كان نفسى يكون ليل صديقة زيك وتكون ليا ذكريات زى اللى بتحكى عنها..
بس الحمد لله ان ربنى رزقنى بأصدقاء اوفياء ومخلصين بحبهم وبيحبونى
يمكن مش بنفس التفاهم والقرب ده،مش مش نفس روعة الذكريات دى،يمكن اقل يمكن ابعد يمكن ..
انما وان الروعة تسكن مكانا ما من تلك العلاقات وانا مدينة لهم بالكثير.
على جنب:لاتعلمى أميرتى مفعلت احرفك قبل الكلمات فى فؤادى الجريح...
كل سنة وانتم طيبين وسلميلى على ماريان كتير

moony_sweety said...

نسيت اقولك انى بغبطك"الحسد المحمود"...بيتهيألى قولتها مابين السطور مش كده؟!!هههههه

أحمد said...

يا سلام على الوحدة الوطنية

Ghada said...

محمد هشام:
كانت صجفة جميلة فعلا إن ماريان تشتغل معايا في مكان واحد، وبالتالي كانت هناك فرصة إنك تعرف عليها وتتعامل معاها.. مش عارفة اللي باقوله ده من باب التحيز ولا إيه، بس متهيألي البنت دي ماقابلتش حد إلا وأثرت فيه :)

مصعب الخير:
وإنت طيب :)

moony_sweety:
يا ستي غبطة محمودة.. وماريان هتشوف كلامك هنا بنفسها.. مش هاحتاج أوصل لها السلام يعني :))

أحمد:
وأكتر بجد :)

شكسبير said...

ربنا يبرك بيها
ربنا هو اللى اعلم بالنفوس

غادة الكاميليا said...

أقولك حاجه زعلت لما قريت البوست ده لأنى أفتكرت صحبتي اللي منسيتهاش أصلا واللي باعتنى واتخلت عنى أنا والتالته بتاعتنا في أول فرصه بعد 8سنين صداقه المفروض إنها صداقه بس مش مشكله ربنا يوفقها لكن صدقينى فرحت برده أوى لأن اللي بينك وبين مريان كبير أوى وعلى فكرة أنا برده لقيت الصديقه اللي بجد أنا بحبها جدا وممكن أقولها من عندك (بحبك يا ندى)
غادة عايزة أقولك حاجه تانيه البوست بتاع لحظه انتى بجد كتبتينى
خايفه إن اللي جاي يكون مرعب
هفضل متبعاكى علشان أنا كمان بحب أكون دايماً مع نفسي

foaa said...

مش من السهل ان الاحساس ده يتكرر كتير حاولى تتمسكى بكل الى قلتيه و حافر جوا فى قلبك اكتر و لو لن والله احساسك ده كفاية قوى لانه صادق و بيدخل القلب
عموما كل سنه و هى طيبة و كل سنة و انتم احلى صحاب فى الدنيا
وفاء

yellowkitty said...

الموضوع دا بيبقي حسب الانسان نفسه

كليوباترا said...

سمعت عنك كتير واول مره ادخل البلوج وانا مرتبكه صدمتينى عارفه ليه لقيت حاجات كده مش اى حد يحس بيها ميحش بيها غير ناس اكبر من اى هفوات و صدمتينى كمان لانى حسيت انى هدخل فى حاله الادمان للبلوج بتاع وانا صعب قوى انى ادمن حاجه اول مره اتناولها وعارفه يا غاده هدمن البلوج بتاعك ليه ؟؟؟؟
عشان كذا حاجه أولا:الهجه العاميه اللى انتى كتبتى بيها واللى هى اقرب لاى انسان مننا
ثانيا:الميوزيك اللى انتى مشغلاها
ثالثا: الحميميه اللى بينك وبين اللى انتى كتباه ونفس الحميميه وصلتنى عشان كده كنت مصدقاكى قوى
رابعا:وده الاهم انك صريحه لدرجه قاتله لدرجه انك تقولى ان صاحبتك اللى انتى فى سنها عندها 23 سنه ودى حاله فريده من نوعها
عاوزه اقولك انى حبيتك فى الله
سلاااااااااااااااااام

كليوباترا said...

قولى لمريان يابخت صفوت بيكى

Aoossa said...

مشاعر جميله
خساره أن الدنيا أحيانآ بتفرقنا عن اصدقائنا وده لأسباب كتير جدآ
بعد فتره عمريه معينه
أو نتيجة الغربه
بنفارق ونودع
وتصبح الصداقه نوع من أنواع الرفاهيه
وتفضل المدونات السبيل الوحيد لبعضنا
عشان يشعر انه لسه عايش فى وسط البشر
كل سنه وأنت طيبه

Zengy said...

قاتلة

احمد فتحى - الكلمة نور والفعل هو ايضا كلمه said...

العيد يعود
والقوم مزيد
القوم بعيد عن فعل الكلمه

والفعل قدير بالارض تميد
الفعل قدير بالارض تميد بعروش الحكم واذناب الطغمه

قد قال حكيم فى الكلمه :
الكلمة نور
ودليل تتبعه الأمة
الكلمة زلزلت الظالم
الكلمة حصن الحرية

نشهد ان الكلمة نور
وان كثير الكلمات قبور

والفعل هو ايضا كلمه
لكن ليس ككل الكلمات

به تحيا أمه .. او تطعن فى القلب تموت
به تسمو أمه .. او تهوى للدرك الاسفل
به ترفع هامه .. او تركع فى قيد الرق مذلل
به تنطلق الخطوه .. او تتعثر فى ذل الحاجه للأرزل

الفعل هو ايضا كلمه
لكن ليس ككل الكلمات

به تنشد حرا .. او تبكى فى كهف مظلم
به تنزع حقا .. او تترك فى ايدى لصوص
به تحمى وطنا .. او تجبن فى وجه طـغاه
به تغدو حرا .. أو تمسى سجينا كل صباح

الفعل هو ايضا كلمه
لكن ليس ككل الكلمات

الفعل دليل على صدق الكلمه
والصدق حياة الاحرار

فلنفعل شيئا ولنحيا حياة الاحرار
لنحرر وطنا من بغى وجور الاشرار
ونهدم اسوار السجن
ونحطم قيد الاسر وحصون الفجار

لنفعل شيئا
ولينهض شعب على فعل الكلمه
ونعيد بناء الامه على صدق الكلمه
وتعود مدينتا لتبقى مصر الاحرار

الفعل هو حقا كلمه
لكن ليس ككل الكلمات
الفعل حياة او وأد حياه
قد تشعل نارا او توقد نورا للخير طريق
قد تقتل شعبا او تحمى امه من فعل الطامع والزنديق

الفعل حياة او وأد حياه
وسواه من الكلمات سكون

فلنفعل شيئا
فلنفعل شيئا ليعود العيد ومعه مزيد
معه مزيد من عشاق الفعل وعلى نور الكلمه .

وكل عام وانتم بخير
احمد فتحى

Ghada said...

الأب الروحي:
شكرا

غادة الكاميليا:
والله أنا فرحانة إنك فضفضتيلي.. الصداقة الحقيقية ماتتعوضش بجد.. سلامي لندى

foaa:
عشان كنت باتكلم من قلبي الإحساس وصل لك.. من المعاميق يعني.. مش ناوية تفتحي بلوجك بقى؟
:)

yellowkitty:
بيكون حسب التركيبة الروحية يمكن :) سعيدة بمرورك

كليوباترا:
والله يا بنتي إنت عسل قوي! قعدت أقرأ في تعليقك كذا مرة.. وسعيدة قوي إنك عرفتيني عن طريق حد! دحنا اتشهرنا على كده :)).. صحيح.. بتقولي إن من أسباب إدمانك -إن شاء الله يعني- للبلوج هو العامية.. يا ترى لو كتبت بالفصحى مش هاتقريلي.. على فكرة فيه أكتر من نص في الأرشيف بالفصحى أحب أعرف رأيك فيهم بجد.. إيه كمان.. آه.. أنا صريحة بدرجة مفزعة فعلا!

أوسة:
عارفة لما توقفت عن الكتابة في البلوج حسيت إن جزء مني بيضيع.. فعلا بالاقي نفسي هنا.. باقدر اتنفس هوا جديد وأقف "مع نفسي" شوية.. حتى أصحابي اللي مش لاقية فرصة أتكلم معاهم في الحقيقية باكلمهم هنا.. حاجة سيئة بجد! بس عارفة؟ تمكنت من إني أقابل ماريان يوم البوست :).. الحمد لله..

زنجي:
هع!

caesar said...

يالهوى على بساطة الكلمات وتعبيرها اللى يخش ف القلب بسهولة مع ان مش اى حد يكتب كدة
صراحة يا اسلوبك سهل ممتنع

Ghada said...

caesar:
متشكرة قوي :) ربنا يخليك..

Anonymous said...

ممكن اكون معرفش حد فيكم بس صدق المشاعر دا نور بينور القلوب الظلمة بجد انا اقتكرت كل صحابي وعرفت ان الذكريات اجمل من اي حاجة وانك تلاقي قلب موجود جنبك حد بيقول ان بيحبك دا سبب كفاية ان الانسان يعيش اتمني ان اوصل ولو لجزء من احساسك سعتها حياتي يكون ليها طعم تاني

Ghada said...

anonymous:
أنا سعيدة جدا بتعليقك ده ! :) بجد :)

emz said...

لازم يعنى يا غادة تقلبى علينا المواجع .. انا كل كلمة قلتيها بتفكرنى بصحبتى مع اختلاف المواقف يعنى .. بس للاسف اضطريت اسافر و سبت مصر و كل يوم بتوحشنى اكتر من اللى قبله .. حلو اوى ان يكون عندك صديقة كده .. كل سنة و هى طيبة

sara86 said...

جميله اوى ياغاده ربنا مايفرق بينكم ابدا
فعلا كانك بتتكلمى عنها صاحبتى بردو زى ناريمان

shereen said...

كل سنة وابتسامتك في قلبك
أد ايه التعبير ده جميل
كل سنة وأنتِ وماريان طيبين وبكل خير