Thursday, November 09, 2006

دفـــــــــا :)

دفـــــا


في الباص الأخضر ابو جنية و10 ساغ، ركبت جنب بنوتة شايلة أكلاسير.. الراجل اللي بكرش كبير كان واقف جنبي.. كل شوية بيقرب من كتفي.. أقوم أنكمش على نفسي زي الأرنب..

البنت اللي معرفش اسمها.. فتحت لي حضنها في لحظة أمومة تلقائية.. ضميتني ليها وحاوططني بدراعها الشمال.. استخبيت في صدرها قوي.. وفضلنا كامشانين في بعض طول الطريق من غير ما نقول ولا كلمة..

شوية والباص وقف عند الجامعة.. طلعت بنوتة تانية فكرتني بواحدة صاحبتنا من ييجي سنتين.. وقفت جنب الراجل ابو كرش.. لابسة إيشارب أحمر وطقم جينز بسيط قوي.. بتسأل على الأجرة وضامة كتبها لصدرها.. بتحاول ترسم إبتسامة.. تعرف البنت اللي بتتحجج بالشتا والبرد لما تسألها "عنيكي ليه مدمعة النهاردة"؟ كانت هي..

لقيت نفسي بأمد لها إيدي وآخد كتبها وأوسع لها مكان جنبنا.. قدامي أنا والبنت اللي كمشانة فيها وكمشانة فيّا.. وبرضه كنا ساكتين..

يااه على الدفا اللي حسيته ساعتها.. لا اراديا لقيتني بأفرك الدبلة في إيدي اليمين جامد ولا كأنها المصباح السحري.. ساعتها بس.. حسيت إن الدنيا خرجت قلبي من ضلوعي وباسته :) !

36 comments:

Dananeer said...

دافيه و حلوه يا غاده بجد
و الصوره كمان

sarah la tulipe rose said...

دايما دفا علي طول كدة
و دايما الدنيا تطلع قلبك و تبوسه!!

Anonymous said...

أنا شامم ريحة تحرش من بتوع وسط البلد في الكلام ده
:)

Ghada said...

dananeer:
الله يخليكي يا فندم.. على فكرة إنتِ تقريبا أول واحدة تقرأ البوست ده :).. كنت بأزبط حاجة.. يمكن كنت باغير العنوان بعديها لقيت تعليقك :)) شكرا يا بنتي للمتابعة..

la tulipe rose:
يا ساتر على قر الناس! :))
يا بنتي ما أنا واخدة على دماغي من فترة.. إنتِ ماقريتيش آخر بوستين ولا إيه ؟
شرفتيني بالزيارة :)

Ghada said...

tarek
فرق دقيقتين بين تعليقي وتعليقك!
كنت بأكتب تعليق للبنات بعدها لقيت التعليقات زادت واحد!.. يا أهلا وسهلا :)

يا فندم البوست مفتوح.. كل واحد يشم الريحة اللي هو عاوزها
;)

Moia said...

:)
ايه الدفا ده كله
انا انكمشت فى مكانى واتفديت بجد :)

Sarah ElTobgy said...

كنت أود أن أكتب عنها منذ زمن...

رحت أصلي القيام ذات ليلة
وكانت تصلي إلى جواري.. رأتني أحاول تدفئة نفسي بنفسي
وكان الجو في غاية البرودة ... كنت أتحرك كثيرا قي الصلاة من شدة البرودة... و في منتصف الصلاة وبأقل حركة ممكنة رفعت بمعطفها الملقى على الأرض وأقتربت نه من يدي النائمتان على صدري...
ولكن من شدة احراجي لم ألبسه...ا

وانتهت الصلاة فإذ بالسيدة تسألني عما اذا كنت مازلت أشعر بالبرد فنفيت في احراج واضح رافضة أن آخذ معطفها من خجلي..
ولكن بعد دقائق عدت في قمة احراجي وبردى أطلبه...

لم يؤثر في انها اعطتني اياه
ولكني تأثرت بشدة لتلك النظرة الحانية التي منحتني اياها ولهذه الطريقة التي ربتت بها على كتفي

ولا اعرف لم كنت سأنفطر حينها في البكاء...

وظللت ادعو لها طوال الشهر...

شكرا لك... أيها الحنان...

This is the first time for me to write for you.. well.. that's what i think :(
You are an adorable writer & what i wrote by the way was "waleed el la7za" ..
Thank you for the moments i have recalled and thank you for 7essek el adabi el 3aali gidan elli 3ala toul bey2athar fyya..

Sorry if i was boring :(

Noran said...

ياه ...ياغادة ...أنتى حسيستنى بالدفا لحظة الدفا ده الأنت عشتيها أحلى من أى دفا فى الدنيا
يارب كده عالطول ....دافيناه مش زعلانه ولا بردانه

sara86 said...

بجد ياغاده فرحتينى بكلامك ده وحسستينى ان الدنيا لسه بدفا
وعجبت اكتر ان انتم رغم ده كله متكلمتوش خالص
جميله بجد

dandana said...

اسمحيلى اعلق على التدوينة
جميل اوى انك تحسى فعلا بالدفئ اللحظى دا
يمن ناس كتير ماكنوش ممكن ياخدو بالهم من شعور بسيط ظهر فى موقف ابسط زى اللى انتى حكتيه
الاجمل بقى ان الواحد يحسه مع حد غريب ..اول مرة يشوفه

خوليو said...

طعم بوسة القلب هو الدفء

moony_sweety said...

بنوته لذيذة مووت ،اسمها غادة محمود
منى للطفلة اللى جواكى سلام كبييييير

كراكيب نـهـى مـحمود said...

الله على الرقه والدفء والعزوبة اللي الكلام طالع بيها البوست ده جرني من لاخر الصفحة احساس بالجمال والانوثة والضعف الدايب في القوة تحياتي ليكي ولمدونتك
كراكيب نهى

Geraldine said...

ربنا يرزقنا بالدفايين الأخضر والدهبي :)

تسلملي روحك الجميلة..

عصفورة السحاب said...

علي فكرة انا اول مرة ادخل مدونتك وتقريبا كده نفضتها ههههههههههههه تقريبا قريت كل حاجة والباقي هكمله بكرة انشا الله . انت جميلة اوي يا غادة بجد حسيت بيكي اوي حسيت بكلامك حسيت بنفسي في كتاباتك حسيت بمرحك وجنانك وكابتك والعيلة الصغيرة اللي جوة
ربنا يوفقك

محمد هشام عبيه said...

بوست من العيار التقيل..من بتوع زمان.. بس بجد ممكن تقولي لي على رقم الأتوبيس لأني محتاج قوي حد- بلاش ياستي الدنيا كلها- يخرج قلبي من ضلوعه ويطبطب عليه شوية؟!

Ghada said...

على فكرة أنا مستمتعة بالتعليقات أكتر من البوست!.. خلينا نشوف

مويا:
يا حبيبتي عشان إنت بس جميلة من جوا وصل لك الكلام.. لولا أنا عارفة إنك في اسكندرية ماكنتش استبعد إن واحدة من البنات دول تكون إنتِ :)

سارة الطوبجي:
you're the adorable one really
لو أي حد بيكتب وصل له تعليق مشابهة لتعليقك هيبطل كتابة! أصله هيعوز إيه تاني أكتر من كده :) بجد أسعدني مرورك، وباشكرك من قلبي على لحظة الدفا اللي إديتيهالي في تعليقك.. اتمنى تفضلي تزوريني كده
and no.. you are not boring at all.. what were you thinking ya3ni?! :)

noran:
آمييين يا بنتي.. ويارب إنت كمان تحافظي على دفاكي جواكي

دندنة:
ما هو عشان كده استغربت! أنا مش من نوعية الناس اللي ممكن تفتح حوارات مع ناس في المواصلات بغرض تمضية الوقت.. بأكش دايما من الناس اللي معرفهاش.. ولو إني باندم على إني ماقلتش ولا كلمة.. ولا كلمة واحدة حتى! دانا خيبة قوي!

متهيألي الدفا اللي كنا حاسيين بيه كان أبلغ من أي كلام.. يااه لو البنات دول طلع عنهم بلوجات وواحدة منهم دخلت هنا!


خوليو:
صح كده:)

moony_sweety:
لسه برضه مفيش بلوج؟ بس برضه باحب عبور الفراشات بتاعك ده.. شرفتي يا فندم.. والعيلة بتحضنك وبتديكي مصاصة اشترتها من المصروف!

كراكيب نهى:
إيه ده.. إيه ده.. إيه ده!
دانا اللي دخت من التعليق! أنا باتعاكس ولا إيه :)) .. احم.. بجد ربنا يخليكي


جيرالدين مش بتاعت ألبانيا (شفتي فاكرة إزاي):

أنا برضه كنت باقول أكيد قارئتي الملكة مانسيتنيش.. آمين يا ستي.. يسلم قلمك وكي بوردك:) !

عصفورة السحاب:
خطوة عزيزة أولا.. شكرا قوي ثانيا.. ثالثا بقى خلصتي قراية ولا لسه ؟!
:D

محمد هشام:
الاوتوبيس كان 6 يا سيدي.. بس مش واثقة من فرصتك هناك الصراحة
:P
ربنا يرزقك بلحظة دفا وببنت حلال تطبطب على قلبك قول آميين..

ابن مرّ said...

احساس الدفء....كم ينعم الله على الانسان بالكثير
اعتقد أن أجمل نعمة والآن فقط أعرف قيمتها
هي نعمة الكتابة والاحساس بما نكتب
ولأجمل منه أن نجعل الآحرين يحسون به حتى وهم يسبحون في مداراتهم البعيدة عن عوالم الدفء

saiko said...

انتى بجد كلامك حلو اوى بالذات مع لسعة البرد الخفيفة بتاعة الشتاء فعلا حسيت بالدفء وانا بقرا البوست الجميل الى انتى كتباه بجد احساسك عالى اوى اوى اوى

شكسبير said...
This comment has been removed by a blog administrator.
Lasto-adri *Blue* said...

فعلا ياغادة التعليقات دفية قوى، والبوست دافى جدا... وانتى بقى..
مش عارفة اقول لك ايه

بس......... غادة بجد.... انا مبسوطة الحمد لله، ومبسوطة اكتر انى شفتك.. وانى عرفتك فى يوم ما من زمان

وعشان بجد الدفا مالى قلبك، يبقى ح تلاقيه فى كل مكان حوليكى
حتى فى اوتوبيس 6

أُكتب بالرصاص said...

يا اخونا
حد يفتح تكييف هنا
العملية دفيت لحد ما الواحد اتحر

حرارة البوست مع حرارة اللقاء عملت
صيف ولا صيف ابو ظبي


المهم

كلماتك قليلة وغير مسفة
وفي نفس الوقت معبرة

واللبيب بالاشارة يفهم

احيييك
وربنا يستر علي بنات المسلمين

Anonymous said...

غادة الجميلة، للطف منك ان تزوري مدونتي الوليدة!
متألقة كالعادة يا غادة!
تمتعي بنهار دافئ:))

Anonymous said...

هل ستصدقينى إن قلت إن قرأت كل تدويناتك سابقة خلال الساعات الماضية مباشرة قبل أن أكتب هذا التعليق, حقيقى كتابتك جميلة أشعرتنى بالراحة و الهدوء الذى قلما نجده هذه الأيام.سأكون سعيدة عندما تزورينى, و لن أجعل زيارتى الأولى و الأخيرة لك

بالتوفيق دائماً,تحياتى

Anonymous said...

وياسلام بأه يا غاده لو كنتى فقعتى الراجل ابو كرش جوز اقلام على وشه.. كنتى هتحسى بدفأ ومتعه اكثر..
ربنا يستركم

Anonymous said...

رائع ..وجميل ..أن تجد دفا من غريب .ولكن هذا موجود برغم الشر فى هذا العالم الموحش يوجد الخير أيضا ..إنها لحظات ومواقف تَعيد لنا الثقة المفقودة فى العالم ....ولكن هل هذا الإنسان الذى يمنح الدفا لأخر ....ياليته يظل هكذا للأبد ..جميل ورائع وينبوع حنان ..يا ليتنا لا تمنعنا أنانيتنا أن نحجب دفئنا عن الأخرين أن نعود كما كنا منذ الأزل كيان واحد ومخلوق واحد ..ولكن المحالات لا تدرك ..أنه قدر ..الغربة قدر والوحدة قدر ...والبرد قدر ...

Anonymous said...

ماشاء الله ربنا يسعد كل انسان
مثل ما وصفتي احساس الطمأننين في كلامك
ويبارك فيكي وفي كل البنات
تحياتي

Anonymous said...

فى الشتا يحلا الدفا
ما احلى الحياه باصحابنا و اهالينا
فى الشتا التقارب الايام بترسم الدفا على عجينة الانسانيه
ليه مع ان فى الشتا برد بحس بالدفا
عبرت عنه ببساطه...الشتا

أبو أمل said...

يااااااه
غادة حسيت بالدفا وانا باقرا

وحسيت بالدفا العاطفى
وبخب الناس
فعلا رااائعة
بس انت كسلانة فى التجول
عبر المدونات
ارجو تشريفى

جمال الدولى said...

انت بتبصى بنضارة
عدستها
كلها تفاؤل
والنبى انت
جواك صافية
تحياتى
سعدت بك

Ghada said...

ابن مر:
همم.. أرى أنك بدأت تستعذب الكتابة العلاجية :).. جيد.. لكن رجاء لا تقسو على نفسك كثيرا :)!
سعيدة لأنك شعرت بالدفء ولو للحظة..

saiko:
أنا اللي سعيدة بتعليقك والله :).. ربنا يديم عليك الدفا

لست أدري:
يا فندم أنا الأسعد بمعرفتك.. يا رب إنت كمان تلاقي الدفا يا لست.. أصله حاجة جميلة قوي :)

أكتب بالرصاص:
:)))))
اللبيب فعلا يفهم بالإشارة
بس فين اللبيب!

anonymous:
فعلا أعجبت بفكرة المدونة.. موضوع الأنونيموس ده لم أدرك أهميته إلا عند بوستات معينة معرفتش أكتبها طبعا!
أتابع جديدك
نهارك أدفأ

safa:
خطوة عزيزة جدا يا فندم.. باتبسط دايما من الوجوة الجديدة اللي بأشوفها هنا.. بتحسسوني إن أنا عايشة
تحياتي ليكي

المهاجر المصري:
مكانش هيبقا دفا، كانت هتبقى نار جهنم ساعتها! العصبية اللي في مواقف دي بتكون أوريجينال!

رجل الموالي:
يا ليته يظل هكذا للأبد.. ماذا سيحدث لو ظل هكذا للأبد.. *تنهيدة*

lion king:
الله يخليك.. وشكرا على التعليق

islam yousef:
:)))))
جميل قوي الكلام ده ..

Ghada said...

ايه الهنا اللي أنا فيه ده! تعليقين جداد وأنا باكتب! :))
أبو امل:
أنا مش كسلانة قوي يعني.. ساعات بس بأكسل في التعليقات..
المهم.. أحسن حاجة إنك حبيت الناس ! :))

جمال الدولي:
والله ساعات بتبقى منغبشة برضه! ادعيلي تبقى صافية على طول..
أنا الأسعد بتعليقك :)

كرانيش said...

انتى يا بنتى مالكيش حل
والله ماليكى حل يا ستى
عالعموم انا مش لفت نظرى الدفا اللى انتى حستيه قد مالافت نظرى جدا انك لما حسيتى بالدفا علاطول ولا ارادى لمستى الدبله اللى فى ايدك اليمين تفصيله مالهاش حل
عارفه ياغاده؟
ساعات الواحد لما يحس باحساس معين يجرى يلمس حاجه من حاجاته القديمه
هديه من صاحبه ليكى
او من خطيبك مثلا
او صوره قديمه
او قصيده شعر
ياااااااااااااااه احساس حلو
عاوزه اقولك كمان انا كليوباترا فكرانى؟ انا اللى قلتلك انى شكلى هدمن البلوج بتاعك وفعلا حصل
ربنا يخليلك خطيبك يااااااارب
قولوا امين يا جماعه

مطفأ said...

جمييييل ..من أجمل الإحساسات التي مرت بي منذ زمن



بلوج آخر ينضم للقائمة المفضلة
:)

maha said...

مش عارفة ليه حسيت اني ممكن اكون كنت معاكوا في الاتوبيس لانك فكرتيني بكذا موقف و انا راحة الكليةو الي حد ما حصل نفس الكلام

جميلة اوي يا غادة
:)

Dena_cause said...

gamel awyyyy enk te7sy bel dafa mn el hagat deh dah yadol 3la enk 2albk abyad awyyy w ndef w el agmal kaman en mn kotr ma ehsasek ha2e2y w dafy kol elly 2aro el post haso zayek belzabt ka2nhom kano m3aky ...bs keda el minibus haytzehm awyyyy :D:D enty bare2a awyyyyy ya ghada :)