Thursday, November 30, 2006

الناس المتعلقة على الحيطة

الناس المتعلقة على الحيطة


في شغلي "بورد" أو لوحة كبيرة للمحررين.. اللوحة دي استخداماتها كانت بتتطور بمرور الوقت.. في البداية كنا بنحط عليها جداول ومواعيد التسليمات، وبعدها بشوية كنا واخدينها هزار.. اللي يعلق نكته.. اللي يعلق مقال حلو.. اللي كاتب حاجة وعاوزنا نشوفها، وهكذا.. وكمان كان ممكن نكتب فيها تعليقاتنا على أي حاجة.. وطلباتنا وكده..

المهم فيه ناس كتير سابت المكان.. مفضلش من الإستاف العتيق غيري وغير أحمد مجدي.. الناس اللي كانت بتمشي كانت بتسيب لنا ذكرى على اللوحة دي عشان نفتكرهم بيها..

أول واحدة مشيت كانت مي.. ساعاتها كانت مناحة، لإننا كنا بنحبها بجد وهي كانت حد طيب قوي وبريئة من جوا كده، ولأنها زي ما قلت لكم أول واحدة تمشي.. بعد كده لما الناس ابتدت تمشي بالتدريج الموضوع فقد عنفه شوية..

مي سايبالنا يومية على اللوحة بتودع كل حد فينا بالاسم.. جنبها هتلاقو ورقة عليها قلب سابتها لنا شيماء أو شكشوكة زي ما بندلعها.. جنبها حاجة كان عمر كاتبها لمي لما مشيت وهو دلوقت مشي هو كمان.. جنبها فيه كارت صغير د/أحمد (رئيس التحرير) كتبهالنا بعد مارجع من أول سفرية طويلة ليه من إنجلترا..

الورق ده مش بيهم ناس كتير عندنا في المكتب دلوقت.. لأنهم ببساطة ماعرفوش الناس القديمة.. فالورق ده بالنسبة لهم مجرد ورق.. مش بواقي أصحاب وناس من لحم ودم.. الورق ده لسه موجود على اللوحة.. يمكن مراعاه لمشاعري أو لإن الناس محرجة تتخلص منه..

الورق ده عمال يطلع في اللوحة لفوق كل شوية، عشان يوسع المكان لورق الجداول والمهام التحريريه.. وساعات كمان فيه ورق بيتحط عليه.. الناس دي بتبعد.. تعرفوا لما تتصلوا بحد واحشكم قوي وتلاقوه نفسكم مش بتقولوا غير إزيك؟ والرد دايما يبقى الحمد لله؟ من غير أي تفاصيل..
إزيك؟
الحمد لله..
أو إزيك؟
ماشي الحال..
وخلاص!

وتلاقي نفسك بعد ما كنت محضر ليسته كلام وتفاصيل عاوز تحكيها، ساكت.. محرج من إنت تحكيها.. أو يمكن مش عارف ترجع الدفا تاني.. أو يمكن حاسس إن تفاصيلك معادتش تهم الناس دي.. أو يمكن حاسس إن التفاصيل كتيرة قوي متكومة من شهور، وفقدت أهميتها بالتراكم.. أو يمكن مش قادر تحدد بالضبط التفاصيل المهمة عشان تحكيها..

مش عارفة إيه اللي جاب الكلام ده دلوقت على بالي.. بس قلت أقول لكم.. وبالمرة أسلم على الناس القديمة كلها.. مي ومنى وإيمان وماريان وأميرة وشكشوكة وعمر وأسماء وضياء ودينا ودينا التانية.. وبس..

28 comments:

Dido's^^^ said...

:(:(:(
عندك حق ... البوست ده واجعني قوي في الوقت ده بالذات

Zanoubia said...

el post da 2al eli kont 7assa bi bzbt
gamil awii ghada
w kaman el o3'neya heya esmaha eh?

Omar said...

دنيا رايحة ودنيا جاية يا غادة.. وزي ما بيقول الشاعر الكبير عمر مصطفى في أغنية "لبنان": (خللوا الصور في القلب);-) يعني كفاية كدة عليها على البورد.. ده مكان ناس جديدة دلوقتي، وخللي الصور في القلب، حيث البراااااااح

Ahmed Shokeir said...

غادة

أخر جزء في البوست بصراحة موفق جدا وعندك حق فيه جدا ، كتير كنا مرتبطين باشخاص نتوقع ان الحياة من الممكن ان تتوقف بعد غيابهم وتستمر الحياة وبعد ان كان هذا الشخص محور الحياة يختفي ويعود اللقاء مرة اخرى بطريقة او باخرى ولكن اللقاء غير اللقاء فاتر وربما بارد رسمي مفتعل
لقطة تقابلنا كثيرا ولكن هناك غادة واحدة تكتشفها وتستطيع التعبير عنها

كرانيش said...

ليه ملاحظتين
ليه مبشوفش غاده غير عند غاده مع نفسى
التانيه : ليه كل ماباجى عندك بحس قوى بشىء بيوجعنى المرادى ليه محستش بكده معبرتيش صح بالشكل الكافى مع ان المشاعر دى بالذات بتاعه الفراق والتعب اللى بعده ممكن يتكتب فيها كلام اجمد من كده
عالعموم ربنا يخليلك صحابك واسمك يوصل البورد"السبوره يعنى يا جدعان" وتترقى وتبقى رئيسه تحرير قد الدنيا
قولو امين

شيماء زاهر said...

البوست يوجع بجد يا غادة..
فعلا أنا نفسي أحيانا بحس بكده..بيبقى نفسي أقول كلام كتير، بس ما تعرفيش إيه إللي بيحصل.وعموما في الحياة عامة بتكون لحظة قاسية أوي لما تدركي إن الشخص إللي قدامك مش مهتم بجد..إهتمام من بره كده و خلاص. حاجة صعبة بجد...

Anonymous said...

مدونتك رائعه جدا واسلوبك راقى جدا فى تعبيرك عن المشاعر اللى جواكى

تسـنيم said...

لمستني كلاماتك في التدوينة دي أوي يا غادة فوق ما تتخيلي أصعب حاجة لما الناس متعرفش قيمة حاجة ويعتقدوا إن الورقة الل متعلقة على الحيطة مجرد كلمتين على ورق للذكرى مش اختصار للحظات وعمر اختزلناه في سطرين وكلمة سابوهالنا ناس كنا عايشين معاهم حتة منهم يعني..
روعة يا غادة فيهما عمق مش هيحسه غير اللي عاش التجربة دي ، عاشها مش مرت عليه مرور الكرام.
تحياتي.

Aladdin said...

كل دول مشيوا من المكتب!!!! أكيد ف حاجة غلط!! :)) (ابتسامة خبيثة)

شكسبير said...

لو كان الكلام ده وداعك لينا
مع السلامة
كانت ايام حلوة قضيناها
معاكى يا غالية

!!!!!!
ممكن سؤال خارج الموضوع
هل فى إعتقادك إن انا
ينفع أكون فعلا الاب الروحى؟
أتمى الرد يا غادة

Anonymous said...

مش عارفه اقولك لغير ان البعاد وحش اوي واللقا بعده صعب بتحسي انك متحجرة مكانك مش عارفة تفرحي مع انك مع صحابك بتوع زمان وممكن تحسي بالحزن وتقولي يااااااه فين ايام زمان ايام ما كنا اول ما نشوف بعض نتكلم ونتكلم ودلوقتي اول ما تشوفيهم لسانك يتعقد مش لان الحب والمعزة اقلت لا ابدا بس , والله ما عارفة اقولك بس ليه بس علشان برده البعد وحش

salateenoo said...

دايما الفراق حاجة صعبة ... انا عن نفسي محسيتش ان القسم بتاع التحرير فضي او مبقاش زي الاول غير لما عمر مشي ....فعلا ...حتى لما بااجي عندكو التحرير ...بحس ان هلاقيه قاعد....على مكتبه ...ولما بلاقي حد قاعد في مكانه بدايق قوي ..مش عارف ليه ...

عمر بجد بجد كان مااالي المكان (مع انه رفيع :))

Anonymous said...

مين بيفضل طول حياته في مطرحه ناس بييجو و ناس في ثانية يروحو

مع ان محمد عطية اللي بيغنيها و انا مش مقتنعة به بس الكلمتين دول فعلا جامدين
مؤثرة اوي

shaimaa said...

الحياة بتمشى
لكن وجع الفراق وحش اوى
و خصوصا لما يكونوا ناس بنشوفهم كل يوم

تحياتى لرقتك اللى مالهاش حل بجد

Ghada said...

dido:

I know :(
معلش.. بس زي ما قلت لك بقى
;)

zanoubia:
الأغنية اسمها
fields of gold
بصوت
sting
نطت في بالي من غياهب الذاكرة كده..

omar:
ماشي يا تواضع
:PP

ahmed shokeir:
صح صح صح صح صح!!
مش متخيل تعليقاتك بتسعدني قد إيه
:)

كرانيش:
:))
بصي هو الموضوع مش بالكلام الأجمد.. المشاعر مفيهاش مزايدة.. الموقف لا يحتمل إلا اللي اتقال واقري رد أحمد شقير عشان تفهمي قصدي
;)

شكشوكة:
متتخيليش قد إيه اتبسط لما سمعت صوتك النهاردة الصبح.. أنا باحبك قوي يا بنت إنتي :)))

أحمد حسن:
أنا متشكرة قوي :)

تسنيم:
كلامك جميل

ابو فروة:
ايه الشر ده!
:)

الأب الروحي:
الحقيقة تعليقك غامض جدا!

عصفورة السحاب:
بس عارفة.. فيه ناس معينة.. قليلة قوي.. الواحد يقدر يتواصل معاهم بطلاقة حتى بعد فترة انقطاع أو بعد..

أحمد سلطان:
:)
نفس الوضع حسيته لما البنات ابتدوا يمشوا.. يمكن إيمان هي اللي فرقت معايا قوي.. لإنها كانت آخر واحدة فاضلة ممكن الواحد يفضفض لها لو كان موجوع..
هيييه.. دنيا

سجينة نفسي:
محمد عطية مرة واحدة :)
سعيدة بمرورك

شيماء:
إنت اللي رقيقة.. ده بس من ذوقك :))

معاذ رياض said...

الناس المتعلقة على الحيطة دول محظوظين أن فيه حد اهتم بيهم وعمل لهم مكان .. حتى لو صغير وحتى لو كانت جداول العمل بتصغره أكتر ، بس هو موجود وبيقاوم. ودا في حد ذاته انجاز.

rony_al3geeb said...

أقدر أدعى إنى فاهمة كويس الكلام ده .. لأنى من أوائل قراء المجلة وتابعت يومياتكم فى أول عيد ميلاد للمجلة وعرفت منها تفاصيل الأفراح الجميلةوأعياد الميلاد الكحيتى والناس اللى جت واللى مشيت .. طبعا دى حاجة توجع القلب بس أنا فرحانة إنك محافظة على مكانك وموهوبة فى شغلك وناجحة فيه

aya almusa said...

nice blog:)

sara86 said...

لازم كان يحصل كده ولن يبقى لكى سوى الذكريات لتعيشى عليها
فيوما ما لابد ان ياتى الفراق
ولابد اننا سنتالم
ويوما ما لابد ان يتفرع الطريق
ولابد سنفترق
عن كل من احببناهم
فلتبقى الذكرى خالده

لقد خفت أن لا تقنع النفس بعدكم ... بشيء من الدنيا وإن كان مقنعا

سلام على الدنيا فما هي راحة ... إذا لم يكن شملي وشملكموا معا

تحياتى غاده

Anonymous said...

سنة الحياة ان الناس تدخل وتخرج من حياتنا...
المهم انهم يسيبوا بصمتهم فينا...عشان نقدر نفضل فاكرينهم...
حتى لو ماقدرناش نكلمهم بعدها...

البوست زى اى بوست قريتهولك قبل كدا..مليان تفاصيل صغيرة ومحببة...

Maat said...

maybe they still wont be in touch, but they left a mark.. a finger print in your heart (i knooow, so cliche). ummm... maybe not everyone would relate or fully understand what it means when u tell stories of when they used to be here, but u'r a writer, write about it, ALOTA people'd be interested to read that ;)

touching post... you think they'd look at my old locker at work and have similar thoughts me now that i'm gone???


w fields of gold kaman... eh el gamal dah :) :)

Anonymous said...

//
جميل
جداً
هذه هى الحياة بلا تفاصيل
أو
بكل التفاصيل
...
//
أحييك

elkamhawi said...

جميل بجد جميل وعلى فكرة قدر يوصل لاعماق إحساسى وفكرتينى بحاجات مكنتش عايز افتكرها عشان اما افتكرها بزعل بس ولا يهمك افضلى انتى زعلينى بموضوعات الجامدة دى وانا هبقى مبسوط ..دى اول زيارة ومش هتكون الاخيرة برضه تحياتى

Diyaa' said...

dymn fy nas btrw7 w msh bn7s enaha da3et mnena bs lw sabo 7aga bse6a zy kda byfdlo fy elzakera
w malo lw tftkry elnas elmt3l2a 3la el7e6a
yhmny r2yk fy a5r post lya ya ghada
if u dont mind
slamo 3leko

Mai Hamdy said...

آه يا غادة....بجد حسيت مقالك أوي...وجسمي قشعر وانا بفتكر كل تفاصيلنا مع بعض...بس حتصدقي اني فرحت اوي ان الورق لسة موجود ع الحيطة رغم اني مشيت من سنتين تقريبا ... بافرح اوي يا غادة وباطمن كل ماجب الاقيه موجود....وفعلا حازعل اوي لو جيت يوم لقيته اتشال!! يمكن تكون انانية..يمكن حب للمكان ورغبة اني احس اني لسة بانتمي هنا ومكاني لسة موجود ولو ع الحيطة

اما بالنسبة لأن الدفا راح من مكالمتنا...مش عارفة...مش موافقة اوي...ومش موافقة ان مفيش اهتمام...يمكن الحياة شغلتنا وبعدتنا شوية...بس لسة لينا مكان في قلوب بعض...وذكريات كتير حلوة يا ريت نرجعها...ولا ايه؟ نفسي اشوفكوا يا عيال

Anonymous said...

انتي تشتغلى ايه؟؟

Ghada said...

معاذ:
معاك حق..
بس تفتكر هيفضلوا مقاومين كتير؟؟
مش عارفة..

روني:
الله يخليكي يا فندم.. أنا بتبسط قوي لما حد يقول لي إنه فاكر الناس دي وفاكرني
ربنا يخليكي بجد :))

آيه:
thank u :)))

sara86:
جبتي من الآخر !
فيه حاجات بديهية الواحد مش بياخد باله منها أبدا

دندنة:
وإنت تعليقك زي كل تعليقاتك.. رقيقة وجميلة :)

ماعت:
:)))))
i thought about the same thing.. whatever will happen when am gone..
for me i dunno the answer, but i bet they're gonna miss u :)

محمد العشري:
ده أنا اللي بحييك والله :)
خطوة عزيزة

elkamhawi:
تشرف في أي وقت.. :)
ومعلش لو زعلت.. مش قصدي!

ضياء:
will check it delwa2t aho :)

mayoosh:
حاسة بيكي..
لينا مكان طبعا في قلوب بعض.. بس بعاد عن بعض..
ساعات باحس بمجهود لما أحب أكلم حد فيكم يا عيال.. ده بيقتلني..

anonymous:
أنا اشتغلي صحفية ومحررة :))

Mohamed A. Ghaffar said...

أحبب من شئت فإنك مفارق
وعيش ما شئت فأنك ميت