Sunday, March 26, 2006

يا دبلة الخطوبة عقبالكم كلكم..


بالرغم من إننا استنينا 3 شهور بعد قراية الفاتحة لحد ما نلبس الدبل لظروف عوائلية..وبالرغم من إني ماعرفتش أعزم كل الناس عشان بيتنا مكانش يستوعب.. وبالرغم من إن الست بهدلتلي وشي بالمكياج، وخلت لوني بلو بلاك (قال يعني أنا ناقصة).. والجاتوة اللي اتفقنا عليه ماجاش واتبدل بجاتوه تاني مش قد كده.. والـ"دي جي" كان عبارة عن تقريبا 3 أغاني بيتعادوا وكل شوية الراجل يشغل اسماء الله الحسنى فالناس تقعد! .. وبالرغم من كام حاجة مبهجة من النوعية دي.. إلا إن..


شوية الرقص والضحك ودموع الفرحة اللي شفتها في عنين الناس.. سواء أهلي أو أصحابي أو أهله.. حضن سمر بنت خالتي ودموعها.. وآية اللي جاتلي بالليل عشان تقول لي إنها عيطت لما شافتني طالعة على السلم هي كمان.. وتصفيق العيال صحابي وزغاريطهم.. والجزمة اللي اتقعلت!.. ودموع خالاتي كلهم وكلمة خالتو شادية "بت إنتِ أنا مش هاحضر فرحك.. مكنتش أعرف إن الموضوع هيبقى صعب كده!".. وضحكة سمر بنت خالته واندماجنا الفوري، وشلة البنات من عيلته وعيلتي .. ونظرة مامته ليا (الست دي سكر بجد).. ومنظر الدبله في إيده..

كل الحاجات دي عرفتني إن المسألة عمرها ماكان ليها علاقة بالـ"دي جي" ولا الأكل ولا القاعة ولا أي عك من ده.. عقبالكم كلكم ..

Sunday, March 19, 2006

الليلة دي عيد ميلادي..



السنة دي حاسة إني عجزت بجد! 22 بحالهم.. رقم صعب إني اتخيله عمري.. ده أنا لسه من يومين كنت بالعب على حصاني الخشب وألون الحيطان بالكوريكتور! يلاّ.. كل سنة وأنا طيبة.. فدايا
:))