Tuesday, February 20, 2007

تاجٌ جميلٌ


بناء على طلب مباشر من كينج تووت وغير مباشر من سولو بارد على الأسئلة القوية دي..

إيه اللي هيحصل لإيميلك لما تموت؟
هيتقفل على الأرجح

إديت الباسوورد لحد قبل كده؟ لو آه كانت ايه طبيعة علاقتك بيه ؟
اديت باسوورد البلوج اللي هي هي باسورد الميل :)! لخطيبي..

اسمك؟
غادة..

اسم الدلع المشهورة بيه وسط اصحابك؟
بندقة وبطوطة وتوتة وغدغود.. على فكرة الاسماء دي مستحدثة.. ماتعودتش على الدلع ده غير على كبر..

عمرك؟
23 إلا شهر!

برجك؟
الحوت.. الحالمة الرومانسية والكلام اللي مايأكلش عيش ده.

مجال دراستك؟
الأدب الانجليزي..

شخصيتك نوعها إيه؟
نوعها يعني إزاي؟.. شوية مزاجية وقلوقة وعلى طبيعتي..

السفر بالنسبة لك؟
متعة مش متاحة طول الوقت للأسف.. عشان أنا بنت وكده..

المود بتاعك؟
بادور على الفرحة زي اللي بيدور على عيل تايه..

وقت فراغك بتعمل فيه إيه؟
يعني إيه فراغ؟..ممكن أتصل بصحابي.. ممكن أفسحني واوديني سينما وأكلني آيس كريم.. بس ماعملتش ده من فترة طويييلة..

الأكلة المفضلة؟
البيتزا والملوخلخ وأي أكل داخل فيه جبنة سايحة.. مكرونة بالجبنة فراخ بالجبنة جبنة بالجبنة.. أموت أنا!

الصفات اللي أخدتها من بابا؟
ملامحي.. حبي للقراية وللغة.. توحدي يمكن.. تصرفاتي وطريقة تفكيري (ده ماما هي اللي بتقول أنا ماوعاش على الموضوع ده قوي)

الصفات اللي أخدتها من ماما؟
أمي دي سكر أساسا.. يمكن اهتمامها بالناس وحبها للخير (دي هي علمتهالي بصراحة أنا مأخدتهاش لوحدي)..

أكتر ست حاجات بتكرهها؟
إن حد يستكردني.. (جت منين الكلمة دي حد يعرف؟).. أو لما حد يدبسني في موضوع غبي ويفهمني إنه عاملهولي جميل..أنا طيبة آه بس مش هبلة!
لما حد يقول عني كلام من ورا ضهري وياخدني بالأحضان يا سينا..باحس ساعتها إني واقعة في موقف سريالي موت.
لما حد يسلم دماغه لحد تاني، ويلغي تفكيره خالص ابسولوتلي!..
لما حد يحاول يخلي حد يحبه بالعافية.. ونظام "إنت بتحبني بس مش واخد بالك"!
إنك تضطر تموت حد جواك، مع إنه لسه عايش..
باكره كمان سُرّاق الفرحة..

أكتر ست حاجات بتحبها؟
باحب ربنا
باحب مكالمة تجيلي في وقتها وضحكة طالعة من القلب
باحب الناس اللي بتحب بجد ومش بتتكسف تعبر عن ده قدام الناس كلها
باحب الكاكاو في يوم سقعة
باحب أطبخ له حاجة
باحب الكلام الحلو والناس الذوق

الشغل بالنسبة لك؟
كويس إن شاء الله!

الإنترنت بالنسبة لك؟
Google!
فعلا يعني.. عندي حق لجوء قومي على جوجل طول اليوم.. دا أنا حتى ساعات باتمنى يكون فيه جوجل في الحقيقة يدور لي على شراباتي في الأوضة الصبح :)

الخمس حاجات اللي محدش يعرفها عنك؟

مش عارفة إذا كان فيه حاجة كده.. حاسة إن أنا فاضحة نفسي على البلوج أساسا.. بس نفكر..

مم.. عندي فوبيا من المستشفيات.. ماقدرش أشوف حد متعور أو منظر دم أو حتى مسلسل ER في التليفزيون! مش رقة.. دي فوبيا.. يعني ممكن يغمن عليا من ريحة المستشفى بس.. (نسيت أكتب المستشفى من ضمن أكتر حاجات باكرهها!)

باخاف جدا من الفشل، وعندي رعب حقيقي من إن بكرة مايكونش بالسعادة اللي متخيلاها.

بيجيلي هاجس إني بادخل البلوجات مش عشان استمتع بالكتابة، بس عشان أعرف أخبار الناس وإذا كانوا مبسوطين ولا لأ (سامحني يا رب!)..

لما باكون على وشك العياط، ومش عاوزة أعرف حد والحد ده سألني، باقول إن فيه حاجة دخلت في عيني! (كده هاضطر أفكر في رد تاني عشان ده اتحرق!)

بقالي كام يوم بنام زعلانة..

أخير أحب أورط
صوت الحواديت وشقير وديدو وتارا وايفوز في هذه الأسئلة والسلام ختام..


19 comments:

ladieskiller said...

انا مبسوط بجد أنك دارسه أداب إنجليزى انا بقيت بحس ان كل الى عامليين بلوجات هما بتوع أداب ومبسوط أكتر أنى أول واحد يقرا ويعلق على البوست بتاع النهارده..وعلى فكره فى سؤال ليكى عن هواياتك..يعنى فى حاجه غير جوجيل !!!

ويجعله عامر

سامية said...

ربنا ما ينيمك زعلان أبداً يا جميل :) ع العموم أؤكدلك انك النهاردة مش حتنامي زعلانة لإن فيه حد حييجي يرقعك علقة سخنة تفقدك الإحساس من أساسه على التدبيسة دي!!!


ما باحبش التاجزي ا غدغووووووووود!
:(
بيبقى دمي تقيل أوي

على العموم برضه أوعدك اني ححاول بجد، بس لو طلع دمي تقيل وما نشرتهاش والنبي ما تزعلي مني! ماشي؟
:)

Walid Elsayed said...

ya Ghada
I really like your blogger and your style. Actually, you are the one who get me into this world few months ago when I found your blogger by chance. Now I made my own blogger and I have a question. Would you please tell me how to add an audio file on my blogger. You may send me at w_elraouf@yahoo.com
thanks

3asfortels7ab said...

إنك تضطر تموت حد جواك، مع إنه لسه عايش..
الجملة دي لمستني اوي لاني عيشاها

Anonymous said...

هاى غادة
بأختصار انت بجد انسانه جميله جدا. وانا بحسد خطيبك . ويارب تعيشى علطول فى سعادة ومتنميش زعلانه ابدا. وأغنيه فيروز رائعه.

أحمد - ahmed_hesa@hotmail.com

Eve said...

حبّيت أجوبتك كتير، وبخاصة بتاعت اضطرار خنق اللي ساكن جوانا، وعامل قلوبنا شقة من غير إيجار. *تنهيدة*. على فكرة، فاهماك كويس بخصوص اللي بياخدك بالأحضان مع ابتسامته الصفراء! فاهماك خاصة في الفترة دي بالذات. يييي! ويا ترى قلتلك قديش بحب الجبنة؟ غرامي!
وبعدين قليلي، مين مزعلك؟ بكره، لنطعميه قتلة. شو الدنيا سايبة؟؟ ما في وراك رجالة؟؟
شكراً كتير عالتاغ غدغودة، حاقوم بالمهمة أول ما يخف ضغط الشغل عليّ.

أبو ضحى said...

انك تضطر تموت حد جواك مع اته لسه عايش
فعلا شئ صعب لكنه وارد كثيرا
حصلت معايا لناس كنت بحبهم بجنون و لكن للاسف اضطريت اموتهم جوايا مع انى لسه بحبهم ،عشان اقدر انا اعيش

حاليا أعيش وحدة قاتمة بعد أن فقدت انسانة اختارت الأخر و قالتلى "أنا اسفة" ،بحاول اموتها جوايا هى كمان قبل ما تموتنى ببعدها

كلمات قالتهالى
بحبك لكنى اديته كلمتى و وعدى و مقدرش اسيبه
أنا فعلا بفكر فيك لكن ده غلط و مش المفروض انه يحصل

كلمة بقولهلها
بحبك و عارف انك بتحبينى مهما حاولتى تكدبى على و على نفسك
انا سبتك تختارى ،أنا لسه بحبك و مستنيك


حاجة كنت عايز اسألك عليها يا غادة :تقصدى ايه بكلمة "تاج" اللى بتكتبيها لما يكون البوست عبارة عن اسألة و أجوبة

Anonymous said...

اسمحيلي اقول
الصديقه غاده
عجبتني جدا جدا مدوناتك التلاته
وخصوصا مع نفسي و كرسي هزاز
فيه ناس برضه لسه احساسها راقي
واسمحيلي اني اقتبست منك عنوان كان لابد ان ارسم
ياريت اعرف رأيك في مدونتي
واكون صديق
وزيارتك تسرنا و سيجارتك تضرنا
قصدي
ليا الشرف يا افندم
من مجهول
http://mn-majhool.blogspot.com/

KING TOOOT said...

أولاً بأشكرك جداً يا غادة على قبول التاج العجيب ده و تلبية الدعوة بهذة السرعة و الروعة
و ثانياً بقى

نرجع مرجوعنا لموضوعنا و نقول و نعيد
نقرا في أسئلة و نشوف أجوبة حقيقية اكيد
نلقى الأصحاب كده مش أغراب و كتاب مفتوح
مع أننا ممكن نبقى هنا ،، و هما بعيد
و عجبي
KING TOOOT

ريما said...

غدغود بجد انتي جميلة اوي
واوعي تنامي زعلانة ياجميل تاني

Ghada said...

ladieskiller:
بسم الله الرحمن الرحيم.. الاجابة الصحيحة تونس
:D
هو فيه غير جوجل.. ألتافيستا وياهو ..(احم..هابطل غلاسة)
باحب، غير القراية والكتابة، الرسم واليوجا
يعني..
on and off keda..

سامية:
كمان كرباج.. آه... ليه كده... آهههه.. إنتي والزمن.. بتتكاتروا عليا يا ولاد اللذينا
:PPP

شوفتيني وأنا بامثل! يا جميلة الموضوع مش اجباري.. أنا كمان مش باحب التاجات.. بس عملت ده..
بعدين أنا دمي تقيل مووت، ومع ذلك جاوبت..
غير إنك أصلا أصلا دمك سكر بجد :)..
ماقدرش أزعل منك يا سمسم (حتى لو نفضت)
;)

walid elsayed:
Thank u so much :)) it's an honour wallahy..
isa I'll send u the code as soon as I can..
w welcome to the blogsphere..

anonymous/ahmed:
احم.. ربنا يخليك.. ادعيلي..
:)

ايفوز:
شفتيني وأنا زعلانة
!..حاجة تقطع القلب يا بنتي
بعدين لو اللي زعلني قرا كلامك أكيد مش هيزعلني تاني.. أمال دا أنا ليا ظهر جامد جدا أهو :)))

ايوه يا بنتي كل الناس الذواقة اللي زينا :DDD
هما اللي بيحبوا الجبنة في الأكل.. قلبي فعلا!
مستنية ردك جدا على أحر من الجبنة السايحة :))
*b2a obssession..help!*

ابو ضحى:
معلش.. ليس كل ما يتمناه المرء يدركه..
هي الدنيا كده.. لازم حاجات تموت عشان غيرها يعيش.. دايرة الحياة بقى..

بالنسبة لكلمة تاج فالمدونين مسميين الأسئلة دي كده
tag..
ومش عارفة كل معاني الكلمة دي غير إنها لعبة من اللي كنا بنلعبها زمان زي الاستغماية.. أو تحديدا لعبة لمس الحمام عندنا لو كنت تعرفها..
ده اجتهادي الخاص يعني يمكن يطلع غلط!

anonymous:
أنا متشكرة جدا..:)
وعلى فكرة "كان لابد أن أرسم".. كانت من جملة لأحلام مستغانمي من ذاكرة الجسد.. زي ما أنا قلت في البوست يعني..
مبروك على البلوج وخطوة عزيزة

king tooot:
العفو.. على إيه :)) أنا كمان حاسة إن التاجات دي بتقرب الناس من بعض.. خصوصا للناس اللي مش بتتكلم عن نفسها كتير..
جميل الشعر ده.. إنت كويس!
:)))

ريما:
ميرسي يا ريما ربنا يخليكي :))
هاحاول افرفش قبل مانام حاضر :)

karamla said...

بجد بحس انك حد جميل اوى ياغادة
كتبتى بالعامى بالفصحى كله منك زى العسل.وبس خلاص
my blogger:http//karamla.blogspot.com

Solo said...

"يستكردنى" ... كلمة اسكندرانى صِرفْ , مرت من هنا جاليات كتيييرة
:)
أصل أنا كمان بكره اللى يلّبسنى جميل قال ايه عاملهولى مخصوص و بتاع , فاكرنى كرُوديا عشان يستكردنى كده
:)
اللى قريتهولك زادك إتساقاً مع شخصية و صورة "غادة" التى أقرا لها هنا , لايقة على بعضك جداً يا غادة
ماتناميش معيطة محدش لايق على بعضه زيك يا ست البنات
:)

مجهول said...

شكرا جدا علي رأيك ياغاده
اسمحيلي اني اضفتك عندي في قائمه مدونات مفضله
ارجو التواصل
بس سيبيني يومين اكمل باقي مواضيع مدونتك
شكرا مره تانيه علي ردك

Ghada said...

karamla:
ربنا يخليكي يا بنوتة.. انتي اللي تعليقاتك كلها عسل :))

solo:
يستكردني طلعت من كده.. فعلا؟
داحنا طلعنا شعب عنصري ابن لذينا!
:))
موضوع الاتساق مع الذات عامل لي هوس!
ومن أكتر الحاجات اللي تأثر فيا لما حد يقول لي إني أشبهني!
مش عارفة أشكرك إزاي يا سولو..والله :))
ومتهيألي البوست الجديد هيفهمك اكتر..
باشكرك تاني :)

من مجهول:
العفو على إيه :))
شرف لي إني أكون من ضمن القايمة..
ازورك من عيني :) ويا رب باقي البوستات تعجبك :)

كراكيب عادل said...

نقاوم الاحزان تارة ونستسلم لها تاره اخري

وما بين الاستسلام والمقاومه تكمن المتعة

حيث ان متعه الحياه في العلو والانخفاض

والله منا فاهم حاجه

مدونتك رائعه هرجع تاني اشوف

تعالي اضحكي عندي

Ahmed Nasr said...


كتبت غادة : ...إن حد يستكردني
(جت منين الكلمة دي حد يعرف؟)..

اعتقد شخص كروديا بمعنى شخص خام أو ساذج

جاية من
crude
بمعنى خام

Anonymous said...

من اشرف

انتي انسانة رقيقة أوي ياغادة
وجميلة من جوة
ربنا يرزقني بواحدة زيك

ashraf_oakh@yahoo.com

Anonymous said...

福~
「朵
語‧,最一件事,就。好,你西...............................................................................................................................-...相互
,以讓>它使...................