Sunday, March 04, 2007

بيني وبيني



بيني وبيني بأقف قدام المراية وشعري مفرود.. باتخيلني ماسكة جيتار الكتروني وبانشّز واتنطط في انسجام..

بيني وبيني بيكون لي جناحين خضر.. باعدي بيهم على البنات الصغيرة بالليل.. وأحط لهم في شنط المدرسة كراريس رسم وألوان..

بيني وبيني باكون طويلة قوي.. أطول من البرج كده.. شايفة كل حاجة بوضوح وباضحك في سري على الناس اللي بتجري تحت..

بيني وبيني بارجع عيلة صغيرة .. مستنية حد يلعب لي في شعري ويديني بنبوناية كبيرة..ويقول لي "متخافيش"..

بينكم.. أنا لابسة إيشارب.. ومعنديش جناحات.. ولا شكلي عيلة صغيرة.. ومش طويلة قد البرج..

30 comments:

KING TOOOT said...

بينك و بين نفسك تشوفي خيال
سهل و سلس و بسيط الرد و الأفعال
تغمضي عيونك تحقيقه يبقى يسير
و تفتحي عيونك تحقيقه يبقى محال
و عجبي
KING TOOOT

aya almusa said...

ياااااااه بينس و بين نفسي أشياء كتيير غير اللي بيني و بين الناس.

Anonymous said...

انتي.. انتي مميزة حقًا يا فتاة..

أنتِ لا تعرفيني.. لكني أفتح مدونتك هذه بانتظام.. أرجوكِ استمري.. أحب ما تكتبينه جدًا..

نورا said...

التعليق الأخير مني :) أنا نورا

Eve said...

so sweet as always :)
btw, i finally answered tag el jobna el say7a!

ابن مرّ said...

هممم طيب على الأقل بينك وبين نفسك كل الحاجات الحلوة دي وزعلانة!!!! طيب ده كده في بينك وبينك عمار

غادة أنا عرفتك من خلال كتبتك وحتى بعد ما التقيتك مع أخوي العزيز لسه زي ما انتي روح محبوسة في قمقم جسمها

صدقيني

كلنا في يوم حنتخلص من اللي بينا و بين الناس ويتبقى بس الحقيقي
اللي بينا وبينا

مش عارف بس بعد ما حتسلمي ورقت اجابتك والأقمقم يتكسر أعتقد انك لو فضلت كده بينك وبينك وبينك وبينا حتطلعي من الأوائل

Dananeer said...

:)

Anonymous said...

أنت بجد تجننى وربنا يحميكى ويخليكى لينا

أحمد - ahmed_hesa@hotmail.com

مجهول said...

وبيني و بينك
البوست ده جميل
بيني و بينك
نفسي ابقا زي الهوا شفاف
بيني و بينك
نفسي اطير
عندي حاجات كتير نفسي ابقا اكونها
انتي ليه كتابات مع نفسك دي تجنن كده
رائعه غاده

عبوووووووود said...

دايما أما بنقعد مع نفسنا بندور على الحاجات اللي ناقصانا ونحلم إنها بقت في إيدينا
..............
mesharef.blogspot.com

سامية said...

الناس بتشوفك زي ما بتشوفي نفسك بالضبط يا غادة. أنا لما شوفتك ولا شوفت الإيشارب ولا غيره. شفت عيون بتلمع وقلب بيتنطط وابتسامة تخلّي أبو الهول يغني!

غني يا شيخة غني! كلنا بننشز
:))

أبو ضحى said...

بيننا إنت بجناحات خضر و طويلىة قد البرج و عيلة صغيرة بضحكة بتجلجل و بتفرح لما تشوف البونبونى
هى دى صورتك فى قلوبنا يا غادة

أتمنى إنك تشرفينى بالمرور على مدونتى الصغيرة جدا
بوجه الدعوة بردو لكل المدونين العرب

حسام said...

الو؟
مساء الخير
"بيني وبيني" بيمسي على "مع نفسي"
البوست جميل بس ياريت متنسوش تبعتو لنا ايجار العنوان
:P

محض روح said...

بينى وبينك
نفسى العمر يرجع والزمن يدور
يمكن نحقق امنينا
الى حلمنها لما كبرنا ولما كنا صغيرن رفضنها
بس ممكن
بوست حلو
:))))

sarah la tulipe rose said...

:)
بيني و بيني انا اخري لا يعرفها احد
ما بينك و ما بينك هوالاصح لانه الاصح!

rudi said...

يا غادة يا جميلة أنا بتابع مدونتك من شهرين كدة ودائماً بحب احساسك الجميل في الكتابة، بأشعر برقتك وقوتك برمانسيتك وواقعيتك ، بطفولتك ونضجكك في كتابتك في آن واحد

Rosa said...

So sweeeeeeeeet

Dr. Tantawy said...

بيني و بينك :) انتي زي العسل :)

ladieskiller said...

عندي قلم

ممتلئٌ يبحث عن دفتر

و الدفتر يبحث عن شعر

و الشعر بأعماقي مضمر

و ضميري يبحث عن أمن

و الأمن مقيم في المخفر

و المخفر يبحث عن قلم

- عندي قلم

- وقع يا كلب على المحضر



أحمد مطر

ladieskiller said...

sorry ya 3'ada enti 3arfa en kol eli betktbeh bey3gbni
estamiri

dandana said...

بينك وبينك...
اعملى اللى انتى عايزاه....
وتخيلى اللى تحبيه....

وبرضو بينك وبين الناس....

لو بطلنا نحلم نموت

تحياتى يا جميل

3lool said...

بيني وبينك مدونتك رائعه والبوست ده عجبتني فكرته واسلوبه جدا

في انتظار جديدك

تحياتي

bonboni said...

بينى وبينك خلتينى افتكر نفسى لما بكون قدام المرايا واتجنن وابقى برده متخيله نفسى حاجات غريبه بس مش شخصيات موجوده فى الزمن ده يمكن حاجات تانيه ممكن شخصيات فى افلام واو من زمن تانى يعنى بس احب ابشرك اننا اتجننا والحمدلله
بوست يجنن
سلام

walaaz said...

مع نفسك
من حقك يا غادة
:)

... لمستى شىء جوايا
شكرا

Oreka d'jadrool said...

جميلة

هبة المنصورى said...

غاده! غاده! غااااااااده! أصحى يلا اتأخرتى ع الشغل

Ghada said...

king toot:
الله عليك :)

aya almusa:
شفتي إزاي :(!

نورا:
أنا باتبسط قوي لما حد يقولي إنه بيتابعني، ومكانش بيبعت لي.. أروع اكتشاف في الدنيا يعني :))

evz:
danta elli sweet wallahy :)
w very clever answers as usual ;)

ابن مر:
فعلا؟ يعني مفيش فرق بين بيني وبيني وبينكم؟ الله يجبر بخاطرك!
مش عارفة أقول حاجة.. ربنا يسعدك زي ما اسعدتني بالتعليق ده

dananeer:
:)))

أحمد:
أنا متشكرة قوي يا أحمد..وسعيدة إنك لسه بتتابع

مجهول:
الله يخليك :)) مبسوطة إن البوست وصل لك.. وربنا يكرمك على المجاملة الرقيقة دي..

عبوود:
ده صحيح.. وخطوة عزيزة :)

Ghada said...

سمسمة:
شوفي يا بنتي.. أنا لما قريت تعليقك عيطت.. مهما وصفت لك مش هاتعرفي كلامك وصل لي في أنهي لحظة وقد إيه كنت محتاجاه .. أنا بس هافكرك بحاجة..فاكره زمان لما بعت لك إيميل عنوانه "تمت بحمد الله" وإنت اتخضيتي ;)?
أهو تعليقك كان كده بالظبط!
باحبك يا بنت إنتي.. ربنا يسعدك زي ما بتسعدي الناس :))

ابو ضحى:
منور.. وميرسي خالص على التعليق الجميل ده.. وازورك من عينيا :)

حسام:
ألو؟ بتقول إيه؟6 كيلو سمك وجمبري..
:D
حاضر.. ليك عندي 1000 جنية مشمشي..

محض روح:
ممكن فعلا؟ ولا احنا اللي بنقول لنفسنا كده وخلاص؟

سارة وردة التيوليب:
أهلا بيكي في النادي يا عزيزتي :)
وكده صح الصح بريزيدون

Ghada said...

rudi:
احم احم.. إيه التعليقات الجميلة دي..
ربنا يخليكي ويفرح قلبك يا رب

rosa:
thank u soooo much :))

dr tantawy:
الله يخليك :)

ladieskiller:
لو إني مش عارفة إيه علاقة الكلام بالبوست بس جميل!
كويس إنه حرك حاجة يعني :)

dandana:
أنا باقول كده برضه.. أعمل اللي انا عاوزاه وعادي ولا يهمني وكده.. بس مفيش حد عايش لوحده يا دندنة
ولازم فيه تضحيات بتحصل

3lool:
أنا متشكرة قوي ويا رب دايما اكون عند حسن الظن

bonboni:
لا ده موضوع الجنان ده قديم قوي :) شوفي لك خبر تاني :)!

wallaz:
شرف ليا إني أكون لمست حاجة جواك فعلا..
:)

oreka d'jadrool:
شكرا :)

هبة المنصوري:
هو إنتي عرفتي!
lol

جـيـداء said...

حياتى كلها عايشاها بينى وبينى

اللى بينى وبين الناس قليل قوى و وحش قوى وغامض جدا..
ولا يذكر

ساعات ما بينى وبينى بيكون جميل قوى .
و ساعات بيكون من اسوأ ما يمكن