Wednesday, March 28, 2007

صباح اليوم



صباح اليوم بطعم الشيكولاتة وعصير التفاح الساخن بالقرفة :)

Monday, March 19, 2007

كل سنة وأنا طيبة :))




النهاردة عيد ميلادي (تاني! الوقت بيعدي بسرعة موت) وبقالي أسبوع عمالة أفكر إزاي ممكن أحتفل باليوم التاريخي ده :) ، فلقيت نفسي مش عاوزة أحتفل بنفسي، بس عاوزة أحتفل بناس من غيرهم دنيتي كانت هتبقى بايخة قوي.. ولما بدأت أكتب الاسماء حسيت بإن قد إيه ربنا بيحبني لإنه محاوطني بيهم.. والترتيب طبعا مالوش معنى..

أمي.. علمتني إزاي ماخافش في الحق وإزاي أضحك من قلبي.. وأنا في الحقيقة ماليش أم واحدة أنا فيه ناس كتير متبنياني :) ومنهن:
سحر الموجي.. مصدر قوة دايم ليا.. كفاية إني افتكر حضنها وكل مشاكلي تهون..
د هالة البرلسي.. بتدلعني لحد ما هتبوظني! عرفتني يعني إيه معنى "الإمتنان" والحب غير المشروط..
خالاتي كلهم.. باشوف معاني كتير قوي لما أحكي معاهم وعيونهم تدمع..

والدي.. كل ما بالاقي حاجة بتاعته باعرف قد إيه فاتني..

"هو".. عارفة إنه عمال يجهز في مفاجأة للنهاردة من سنة تقريبا! (يا حرام).. باتبسط عشان بنتعلم حاجات كتير من بعض وبنبهت على بعض كل يوم! :)

ماريان..أنتيم 1 بنفهم بعض من غير كلام.. ومنطقها دايما بيريحني..

شريفة.. أنتيم 2.. عمري ما بضحك الضحك ده مع حد غيرها! دايما فاهماني، ودايما قلبها عليا.

مريم.. أنتيم 3.. جميل لما الواحد يلاقي حد يجاريه في شطحاته ويفهمه ويكون جنبه وقت ما يحتاجه..

د/أحمد.. من أكتر الناس المأثرة فيا.. في محاضراته إداني مساحة "أكون" فيها غادة.. وكان دايما بيشجعني، وحتى الآن.. لو بس قالي "برافو" بابقى سعيدة 7 أيام ورا بعض!

فيه كمان 2 عزاز على قلبي قوي مع إني ماشفتهمش كتير.. يمكن واحدة فيهم اتكلمت معاها في الحقيقة مرة أساسا..
رحاب وسامية .. معرفتش ماكتبهمش، بس الواحد فعلا بيتبسط لما يقابل بني آدمين بجد.. محافظين على أرواحهم الجميلة اللي بترفرف على اللي حواليهم وبتدفيهم.. وحتى لو كلامي ده هيفاجئهم، بس هما فعلا غيروا من وجهة نظري تجاه الحياة قوي...

يلا كل سنة وأنا طيبة وإنتم كلكم طيبين :)

Sunday, March 11, 2007

البلدة البعيدة وراء المرآة



البلدة البعيدة وراء المرآة






في الصالة الرياضية استخدم الدراجة الثابتة.. أبدل بعنف لعلي أصل للمرآة التي تغلف الحائط المقابل، واتعجب لفكرة الهروب الملحة على رأسي بشده مؤخرا، وافكر..

ساعبر خلال المرآة.. سأشعر ببرودة تلامس بشرتي مع السطح المصقول للحظات، واسقط في بركة كبيرة للكرات الملونة الصغيرة.. ساندهش واضحك.. ثم اتجول في تلك البلدة.. بيوت من الحلوى وحدائق واسعة مسيجة بعيدان القرفة التي تبعثر إلهامها في المكان.. مساحات خضراء وعشب مبلل أخلع حذائي وأجري فوقه وأقفز.. عصافير وشلالات مياه وفراشات ملونة صغيرة ألاعبها وتلاعبني.. سلم من قطع سحاب وفتيات صغيرة بفساتين وردية وصفراء وفيونكات حريرية شاهقة البياض.. لا أنا ولا أنت ولا هم ولا هؤلاء ولا هي ولا تلك الأخرى.. ولا عملي ولا بيتي ولا مشاريعي ولا أجندتي.. ولا قلقي ولا وجعي ولا غضبي ولا كوابيسي الليلية.. فقط هذا الجمال المصفى والانغماس فيه..

إيه ده كله؟ رحتي فين؟
يعيدني صوت مدربتي للأرض..
"هاه؟ ولا حاجة.."
انظر حولي، تذوب البسمة.. اتنهد واترجل، وعلى لساني جملة واحدة أخجل من أن أقولها "ممكن شوية كمان؟!"

Sunday, March 04, 2007

بيني وبيني



بيني وبيني بأقف قدام المراية وشعري مفرود.. باتخيلني ماسكة جيتار الكتروني وبانشّز واتنطط في انسجام..

بيني وبيني بيكون لي جناحين خضر.. باعدي بيهم على البنات الصغيرة بالليل.. وأحط لهم في شنط المدرسة كراريس رسم وألوان..

بيني وبيني باكون طويلة قوي.. أطول من البرج كده.. شايفة كل حاجة بوضوح وباضحك في سري على الناس اللي بتجري تحت..

بيني وبيني بارجع عيلة صغيرة .. مستنية حد يلعب لي في شعري ويديني بنبوناية كبيرة..ويقول لي "متخافيش"..

بينكم.. أنا لابسة إيشارب.. ومعنديش جناحات.. ولا شكلي عيلة صغيرة.. ومش طويلة قد البرج..

Friday, March 02, 2007

وقلت..


العمر أقصر من إننا نضيعه..
زعلانين