Monday, February 25, 2008

متلازمة الحمل والانتفاخ والسعادة

متلازمة الحمل والانتفاخ والسعادة


منذ فترة وأنا أنوي على الكتابة عن تجربة الحمل، وعن الصغير الذي يرافقني ويشاركني جسدي منذ 6 شهور تقريبا. لست وحدي من تحمس لهذا، زوجي أيضا قال لي أنه سيكتب للطفل حتى يشعر بمدى أهميته بالنسبة لنا حتى قبل أن يولد وقبل أن نراه. أخبرته بأنها فكرة عظيمة جدا، وبأنني لازلت أعتز جدا بالصور التي التقطت لوالدتي حينما كانت حامل فيّ مرتدية الفستان الأخضر القطيفة وتقف إلى جوار تلاميذها في صورة جماعية في مدرسة الليسيه حيث كانت تعمل وقتها. وعندما كنت صغيرة وكان يزورنا الضيوف كنت فخورة جدا بإطلاعهم على الصورة قائلة في حماس "أنا كنت هنا جوه" مشيرة إلى بطن والدتي المنتفخة بشكل واضح.

المهم، ولسبب ما –أخمن أنه السعادة الجارفة مثلا- لم أسمع زوجي يتحدث عن الكتابة للطفل مرة أخرى. وأنا الأخرى لم أجد ما يمكنني قوله حول التجربة. كل الأحداث المتعلقة بشهور الحمل الأولى لم تكن سعيدة جدا، وأنا لم أرغب في تدوينها. أما الآن.. فالوضع اختلف..

إحساس..
يقولون أن للأم علاقة خاصة بأطفالها لا يمكن أن يشعر بها أحد سواها.. وتأكدت لي هذه المعلومة منذ عدة أيام.. كنت واثقة من أنني أحمل صبيا.. من أول يوم تأكد لنا خبر الحمل عرفت أنه صبي، وحلمت بهذا في نفس اليوم أيضا.. كل صديقاتي يعرفن أنني أحب البنات جدا وأنني لا أميل إلى الأولاد.. زوجي أيضا يحب البنات وكذلك أمي وحماتي التي لديها لهفة خاصة للبنات لأنها لم تنجب سوى صبيانا.. لذا كثيرا ما كنت أمزح مع صديقاتي بشأن عدم الحماسة التي ستلاقي الكائن الصغير.. وكنت أخبرهن بأن المتحمسة منهن للصبيان، ستتبناه رغما عن أنفها.. كل هذا وأنا أضحك وأدعو الله سرا أن يخيب ظني..

سونار
ذهبت وزوجي لإجراء "الدوبلر" وهو بحسب ما فهمت نوع من أنواع السونار لكنه متطور بدرجة ما فيمكنه حساب وزن الجنين وحساب كمية الدم الواصلة له وكمية الماء المحيط به بالإضافة إلى قياس طول أطرافه وحساب محيط الجمجمة، إلخ.. وفي وسط متابعتي للشاشة قال الطبيب.. "وطبعا ولد إن شاء الله".. نظرت إلى زوجي نظرة "مش قلت لك" ووجدته يبتسم ووجدت نفسي سعيدة جدا وأنا أتابع حركة الصغير على الشاشة.. تلك الحركة التي تأخرت كثيرا في الشعور بها لسبب ما لا أعرفه.. كانت الحركة ضعيفة وقت السونار وقلت لنفسي ربما كان نائما، وبعدها بعدة أيام تأكدت من هذا فعلا.. فصغيري لا يحلو له "الرفس" ولعب الملاكمة إلا في الليل حين يغالبني النعاس وأحاول النوم.. فتفاجئني ركلة قوية أو سلسلة من الركلات تجعلني أصرخ من الألم! وتلك الركلات –بخلاف أنها مؤلمة- جعلتني أبدأ فهم الموضوع.. هناك كائن يسكنني! حركاته ملموسة ونبضاته محسوسة.. يحب الجبنة البراميلي بالفلفل مثلي تماما فيقفز من السعادة داخلي إذا تناولتها ويثيره الطعام الثقيل ويقلق راحته.. أما الزبادي فيجعله مسترخيا يسبح داخلي في هدوء ودعه.. كل هذا يجعلني سعيدة جدا.. هو ابني أنا.. لا يهمني إن كان صبي أم فتاة.. السعادة واحدة والاندهاش واحد واللهفة واحدة والارتباط واحد والألفة والونس واحد..

عادي ولا دايت؟
في الأسبوعين الماضيين فقط لاحظت انتفاخ بطني المفاجيء.. فحتى الشهر الخامس كان يمكنني التخفي تحت شال مشجر أو بلوزة واسعة بعض الشيء دون أن يعرف أحد أنني حامل.. أمي وصديقاتي أكدوا على جدوى استراتيجية التخفي التي اتبعها وبأنني فقط "تخنانة شوية بس مش باين عليكي".. لكن في هذه الأيام ازداد حجم بطني بشكل ملحوظ وقلّت مقدرتي على الحركة والمشي بشكل طبيعي وازداد "النهجان" وضيق التنفس حتى في الأوقات التي لا أتحرك فيها..

أما ما أكد لي حالتي فهو السؤال الذي سمعته لأول مرة في حياتي من صاحب السوبرماركت الموجود تحت البيت عندما اشتهيت البيبسي الممنوعة عنه بأمر الطبيبة حينما قال لي ببساطة "عادي يا فندم ولا دايت"... !!

مؤازرة
حادثة واحدة فقط لم تفلح فيها استراتيجية التخفي.. كنت ما أزال في الشهر الرابع مستقلة عربة مترو السيدات عائدة للمنزل حين أتاحت لي سيدة حامل "جدا" (في الشهر التاسع ربما) مكانا إلى جوارها.. وعندما جلست والتفتت لأشكرها نظرت لي بعطف قائلة "حاسة بيكي" وابتسمت في رضا.

52 comments:

dandana said...

فكرتينى والدتى لما كانت حامل فى اختى الصغيرة ندى

من من اول شهر تقريبا كانت بتقول انها بنت

مع ان كل الناس اللى حوالينا كانو نفسهم فى ولد مش فاهمة ليه

انا عن نفسى كنت عايزة بنت ...وكان الاتفاق انه انا اللى هاختار اسمها

ولما ماما كانت رايحة تعمل السونار اول مرة..قالت قبلها...لو بنت ..انا هاسميها ندى...اعترضنا كتير انا واختى ..الاتفاق مش كدا...لا لا ..ابدا
حتى لما كانت هى عند الدكتور كنا بنخطط ازاى نقنعها بأننا نسميها..
ولما رجعت من عند الدكتور..وعرفنا انها فعلا بنت..
ماما قالتنا..مش قولتلكو..مش محتاجة سونار من الاول...هى ندى

انا فعلا قدرت احساسها اوى...دى بنتها...هى اللى كانت حاسة بيها من الاول..وهى اللى من حقها تختارلها كل حاجة من اول الاسم ..لغاية العريس ان شاء الله

على فكرة انا سمعت ان الميوزيك حلوة اوى للجنين...ندى رقصت جوا ماما لما سمعتها ميوزيك...كان عبد الحليم..ماكنتش عايزاها تطلع تقولى تامر حسنى..

مش عارفة..عايزة اقولك حاسة بيكى زى الست اللى فى المترو..بس فى نفس الوقت مش هابقى واقعية

معايشتى للتجربة مع والدتى هى اللى مديانى الاحساس دا...كأنى مريت بيه قبل كدا..انا فاهمة انه مش بكل تفاصيله...
بس حاساه

ع العموم..
ربنا يخرجهولك للدنيا بالسلامة..ويمارس ملاكمة براحته بقى..الدنيا واسعة

zordeak said...

ربنا يفرحك دايما يا غادة ويسعدك ويجيبلنا منص على خيير

تخيلى معايا كده الاسم

مَنَّص حَامِد

اسم سينمائى جدااااااااااا

:D


هتسموه أحمد على اسمى
مليش دعوة اهو انا قلتلكو من بدرى علشان تعملو حسابكو


بس كده


ملحوظة صغيرة

هيفرح أوى أوى لما يقرى اللى انتى كاتباه عنه ده

:)

ميشيل حنا said...

ألف مبروك يا غدغود على الملاكم الصغير
:)

Zianour said...

لا تتخيلي مدى سعادتي بزيارنك التي تعني لي الكثير!!
وانت دائما موضع ترحيب وعلى فكرة منذ المرة الاملى التي قرأتك فيها ادركت ان هناك خيط ما يجمعنا ربما الاشياء الصغيرة!!!
وانا كنت مخططة للحضور للمعرض بس حصلت ظروف وماقدرتش احضر.. انا اول مرة اشوف البروفيل بتاعك وصدق حدسي لما وجدت انك تحبين كتاب "فيرونيكا تقرر ان تموت" لباولو كوهلو وكذلك حبك للتصوير بالاضافة طبعا للافلام التحفه اللي كتباهم
المهم انك رجعتيني اربع سنين واكثر لما كمن حامل في نور اولا كنت اريد ولدا -اعتقد انني لا املك الشجاعة لتربية بنت!!رغم رغبة زوجي في فتاة تدلعه بدل الكلاب (يقولها بكل حب وغيرة) اللي بيحبوكي اكثر مني-- وكان نور بطئ الحركة جدا وكمان الحمل لم يظهر علي الا في السابع مثلا بس انا كنت اطبطب كثيرا على بطني وكان نور يتفاعل احيانا بالرفس لاسفل!!!

Zianour said...

نسيت ادعي لك ان يبارك لك الله فيما رزقك وان تسعدي به ويسعد بك انا كنت ادعو "اللهم اجعله قرة عين لي" وفعلا هو ملئ السمع والبصر هو واخوه ..ربنا يقومك بالسلامة !!

إبـراهيم ... معـايــا said...

تدوينـة تحفـــة، وإحساس منقول بروعـة وجمال متناهي ....
إيه ده يا بنتي ده كلله !!
.
.

ربنا يقومك بالسلاامة يا فندم ، ويجعله وش سعاد وهنا عليكم

ايامى .. said...

ربنا معاك ويقومك بالسلامة باذن الله
واسال الله العظيم رب العرش العظيم ان ينشاه النساه الصالحه ويكون قرة عين لك ولابيه.

وحقيقى بجد الكتابات دى حتبقى جميييله جدا باذن الله لما يكبر كده شويه ويقراها

وربنا يبارك لك ويبارك عليك

محمد عبد الغفار said...

لحد دلوقتى مش قادر افهم كل الستات ليه بتبقى عاوزه تدارى بطنها فى حين انها المفروض تمشى بيها تتباهى وتتقمع

نصيحه مجربه سمعي الجنين كل يوم نصف ساعه قرأن ويا حبذا لو فى ميعاد محدد

Shimaa Gamal said...

He will be as talented as his mother isa :)

rabena ye2awemek bel salama.

ايام العمر said...

اكيد انا سعيد بسعادتك وفرحك

بولى العهد الجديد

والى بنعرف اخبارة وبتدوينات رائعة

وكويس انة كان سبب فى انك كتبتى لانى كنت خايف انة يكون فى عدم كتابتك
بسب الحمل ومتاعبة
ربنا يقومك بالسلامة (هو لية دايما بقولوا كدة للحامل)

ماعلينا

ا ه

على فكرة حكاية انك تشوف صورنك ةانتى فى بطن امك لذيذة جدااا

انا والدتى كانت متصورة بيا وانا فحور اووى بالصورة دة



بس انتى ناوية تسمية اية ؟

geraldine said...

يا دي الجمال يا دي الجمال :)

حسام said...

جبنة براميلي ايه وزبادي ايه يا مفترية
هو الحمل بقى في المعده ولا ايه :P

الواد ده حتسميه البيج بوس، ماليش دعوه..هه!

ربنا يوصله بالسلامة ويفرح قلبكو بيه

karma said...

كثير من الدفء هنا

:)


أتم الله فرحك على خير.

samourai 4 ever said...

على فكرة انا لسه فى الكليه و لسه متخطبتش و لا اتجوزت
بس بجد انا مشتاقه اوى انى ابقى ام
و اللى مزود الشعور فيا
انى فى كليه رياض الاطفال
و كل يوم ادرس عن الاطفال و اقرى عنهم
و عندى خبرات كتيرة اوى اوى
نفسى ابقى ام عشان
انا عارفه انى مش حبقى زى اى ام عاديه كدة
و انى حعمل حاجات كتير اوى اوى
مختلفه عن بقيه الامهات ممكن يعملوها غلط و دة بيبقى غصب عنهم
بس هى مجرد العادة و سماع كلام اللى اكبر منهم
بس مش كل الكلام اللى بيتقال صح
فى حاجات كتير بسيطه جدا
الام مش بتاخد بالها منها
بس بعد كدة بيبان قيمتها
و دة بيبان
لما لا قدر الله الطفل يتعب و يروح للدكتور
فالدكتور يروح سالها سوال هو انتى مثلا بتاعديه ازاى
هو انتى مش عارف ايه
كدةيعنى
و بيسالها على حاجات بسيطه جدا
الام بتبقى بتعملها بعفويه
انا مش بقول انى خلاص عندى كل الخبرة
بس بقول ان الامومه دى شى مش سهل
و مش صعب
بس بجد الف الف الف مبروك
و ان شاء تكمل سعادتك لما تولدى ابنك
صحيح انتى بتفكرى تسميه ايه؟
و دمـتــــــــــــــــــــم

طائر حزين said...

حسة بيكى جدا جدا جدا.ابنى عنده الان 8 شهور.ومهما اى شخص وصف لكى علاقتك به لن تتخيليها حتى تضميه بيديكى الى حضنك .ستشعرين انك تتمنين لو يسكن مقلتيك أو يصبح نبضة فى قلبك. ستجدين نفسك تضحكين بشدة مهما كنت متضايقة أو متنرفزة عندما يبتسم. و عندما تسمعين ماما لأول مرة ستشعرين بفرحة ليس لها مثيل و ستنتظريها بعد ذلك و ستطلبيها منه"قول ماما تانى بأة" "والله قالهالى من شويةمش مصدقينى؟دلوقت يقولها تانى" .أحلى احساس فى الدنيا سبحان الله ستجدينك تفعلين أشياء لم تحبيها يوما قط و انت فى منتهى السعاده. ومهما كنتى نائمة و مرهقة ستجدين نفسك مستيقظة عندما يكون جائع و :أن هناك شئ سحرى بينكما.وعرفة كمان هتحبيه اكتر من والده واخوتك ووالدتك.

Ahmed said...

ربنا يقويكى و يتتم ليكى على خير و يباركلك فى ابنك ان شاء الله
بجد كلامك دا هزنى جدا و بالرغم من انى لسة شاب 21 سنة بس فعلا بعد كلامك دا خليتينى احس انه امتى بقى الواحد يتجوز ويبقى عنده عيله و يحس الاحاسيس الجميلة دى
ياريت ماتنيسش تبقى تردى على طلبى اللى سيبته ليكى فى التدوينة بتاعة الطبعة الاولى من الكتاب
معلش بتقل عليكى
و تانى ربنا يباركلك فيه

Dina El Hawary (dido's) said...

:) :)
يا حياتي .. التجربة جميلة ولازم تكتبي عنها أكثر وأكثر يا غادة
فرصة لا تعوض
وتقومي بالسلامة إن شاء الله يا جميلة

Esraa Hamed said...

يا بخته البيبي الجميل ده اللي هيطلع يلاقي مامته كده زي العشل و كووول الناس دي مستنياه و فرحانه بيه
يعني مشهور كده من يومه
ههههههههههههه

ماشاء الله يارب يباركلك فيه و يجعله خير الولد ياااارب

واصطنعتك لنفسي said...

ياااه يا غادة :) ربنا يباركلك يا رب في ابنك ويقر عينك وعين والده به إن شاء الله..بجد الدعوة طالعة من جوا قلبي جدا..يا رب يكون ابن صالح وبجد ربنا يباركلك فيه

بالنسبة بقي للبوست.. بصراحة حسيت أن في مشاعر كثييييير لسه جواكي تجاه هذا الكائن..يمكن خايفة تحبيه أوي من دلوقتي وتتعلقي به..ويمكن حاولتي تختصري..بس برضه إحساسك به وصل..بجد بوست رسم إبتســـامة عريضة جدا علي ثغري..

بنت امي الغالية said...

ههههههههههههه
فكرتيني بالذي مضى ، كانوا تسع شهور قصجي عشر شهور تحفة بس بجد نصيحة من مجرب استمتعي واكتبي كل حاجة والله يابنتي فكرتيني باول بوست كتبت فيه عن الحمل وكانت مشاعري جميلة قوي عارفه انا ولدت من اسوبعين تقريبا ومش قادرة اقولك قد ايه مفتقدة بطني وانا منتفخة ونايمة ومش قادرة اتقلب ع السرير

مبرووووووووووووووك انا مكنتش اعرف انك حامل بس لما شفتك النهارده على اوتي في لقيتك بعجرتي وافتكرت اول مرة اتقابلنا فيها وكنت انا مبعجرة وجه عليكي الدور بقى ابقى اكتبي وانا هادخل اشوف ابنك اشقى ولا بنتي

حاسوباتيه said...

ربنا يتمملك بخير يارب وانا شفتك على او تي في في مساءك سكر زياده انتي اموره خالص واتمنى تشرفوني بزياره مدونتي المتواضعه

Anonymous said...

3alikom assalam, Ana awal mara baktib lik ya ghada. Awalan Mabrook 3la almodawana algamila di w thanyan 3la alkitab w thalithan 3la algawaz w raby3an 3la albaby w inshallah '7amisan 3la wosolo bialsalama w gomtik enti bisalamah. Ana f nafs 7altik 7amil fi alshahr 7 bs l7adi alan mosh motakida bint wala walad!!!!! ra'3m ini 3aysha fi alyapan,, ana sudania. w mabsota gydn eni etka3bilt fi modawntik ,, asalan ana shoftik m3 Mona alshazli fi al3ashira msan. b7ib kitabtik gydn w ba7is enk btishbahini ( the way I think n feel). Baz3l gydn lma ad'7ol w malgakish katba 7aga gydida,,,3omoman Rabna ywafagik w y7agig omniatik

هبة المنصورى said...

:)
عارفه
باسمع عمرى معاك
غنوة أنغام
لقيتها خلفيه جنان للتدوينه دى

ربنا يعينك
وهادياكى الغنوة عشان تهديها بدورك للنونو

يااااااه
ياما القلب كتير اتمنى
يجرى عليك وأنا أقول له استنى
بكرة مع الأيام تتهنى
عمرى معاك

Lilac said...

أتابع المدونة منذ فترة بعد أن اصرت صديقتى المقربة على اننى لازم ادخل واقرا البوستات..فقرأت وزاد شغفى بالمدونة بعد قرااءة كل بوست، وكثيرا ما كنت ارغب فى التعليق ولكننى اتراجع فى اللحظة الأخير، الى ان قرأت البوست الأخير ولم اتمالك نفسى
..

انا مثلك..آداب انجليزي.. متزوجة حديثا..حامل..وفى اواخر الشهر الخامس..وكنت اعرف انى حامل ببنت قبل رؤيتها على السونار..واحسست بحركتها متأخرا..ودوما كنت اتباطأ فى كتابة اى شىء عنها حتى فى مذكراتى لسبب ما لا اعرفه..
عندما قرأت ما كتبتيه شعرت بأنك تترجمين الكثير والكثير مما كنت اشعر به..واحسست بفرح شديد..انا لست وحيدة..ولا فريدة من نوعى
..

أعشق اسلوبك السهل الممتنع فى الكتابة، ونظرتك غير التقليدية للموضوعات

ربنا يكمللك على خير ويحققلك كل ما تتمنيه..

farida said...

ربنا يكملك على خير يا غاده
أكيد الولد اللي تربيه أم بشخصيتك حيكون شخصيه متميزه جدا

كالعاده و ببساطه توصلني لأعماقك بأقصر الطرق

أحييكي

مستــ ج ــــدة said...

ربنا يباركلك فيه ياغادة ويوصل بالسلامة ان شاء الله.....التدوينة جمييييييييييييلة اوى

كرانيش said...

صوره الحامل عندى ثابته بانها هى ست حلوه كده وشها شويه تخنان حاطه ايد فى ضهرها والتانيه على راسها وبتسوط وبتقول اه يااااااااااااااااااانى

لذيذ موت الموضوع ده
الست دى بتسوط بس مش عشان تعبانه لا دى عشان عاوزه تلفت نظر الناس ليها وتقولهم انا هبقى ام قريب وعندى بيبى جميييييل زى الكبار


ربنا يخليهولك يا قمر

يقول أنى امرأة said...

ربنا يكملك على خير
انا حاسة بيكى و لسا كاتبة عن الحكاية دى عندى فى المدونة
دى المدة الوحيدة الى هتكونى فيها انت و صغيرك لوحدكم
اول ما يطلع للدنيا واحدة واحده هيبتدى يبعد و يدخل فى حياتة ناس كتير و يبقى لية عالمة الخاص بعد ما كان رحمك هو كل عالمة
تحياتى

romalistic said...

ربنا يتمم الحمل على خير و ربنا يقويكى و ان شاء الله ييجى بيبى أمور و لذيذ و يبقى انسان صالح.
نقلتى لنا احساسك بطريقة رائعة فعلاً .. خلتينى أحس ان الحمل ده جميل .. أصلى دايماً بحسه حاجة متعبة أوى و صعبة و مش متخيلة انى أمر بالتجربة ده .. حببتينى فيها
:)

Rosa said...

:) :)
مش عارفه اقلك ايه بس بجد تدوينه تحفه
قفشت نفسي وانا مبتسمه ابتسامه عريضه
بتنفس بهدوء واحساسك واصلي
تقومي بألف سلامه يا رب
:)

B000DY said...

هايل جداً
مدونة رائعة

حمامة said...

.. هو ابني أنا.. لا يهمني إن كان صبي أم فتاة.. السعادة واحدة والاندهاش واحد واللهفة واحدة والارتباط واحد والألفة والونس واحد
>>>
عجبتنى اوى الجملة دى
بجد ربنا يقومك بالسلامة يارب
ويبقى ولود عسول كده ومقطقط

:)

Ghada said...

dandana:
حاسة بكلامك قوي.. أنا كان عندي نفس الشعور لما خالتي كانت حامل.. هي أصغر واحدة فيهم واحنا كنا دايما صحاب.. لما كانت في الشهر الثامن خليتني أحط ايدي على بطنها واحس بحركة البيبي.. أنا طبعت اتسرعت! بس لما شفت منظر وشها ساعتها ومغطياه ابتسامة كبيرة كده حسيت بالرابطة اللي بينها وبين ابنها قوي :)

zoredak:
في الحقيقة لسه ما استقريناش على اسم.. بس نرحب بالاقتراحات طبعا :)

ميشيل:
الله يبارك فيك :) وعقبال ما تلاقي بنت الحلال كده اللي تخليك تعيش التجربة دي عن قرب..

zainour:
أنا اللي المفروض اشكرك إني لقيت مدونتك في الوقت ده :) على فكرة هيكون فيه كذا حاجة في شهر مارس إن شاء الله.. حفلات توقيع وندوات وكده وبجدا اتمنى اشوفك في أي واحدة منها.. أنا هاحط لينك للصفحة المعمولة للكتاب على الفيس بوك عشان دي فيها كل الأخبار والتواريخ وكده.. بس كبداية فيه ندوة إن شاء الله في الساقية يوم 5 مارس الساعة 7.. هاكون موجودة مع رحاب وغادة برايد.. ضروري ضروري أشوفك.. هاه؟ :))
صحيح.. ميرسي قوي على الدعوة الجميلة دي.. أنا دايما باقول رينا يخليه من الذرية الصالحة لإني حاسة إن تربية الولاد أصعب من البنات..

إبراهيم معايا:
:)) آمين ومبسوطة إن التدوينة عجبتك

ايامي:
أنا من دلوقت مستنياه يقرا عشان أشوف رد فعله على الكلام ده :)! نورت المدونة :))

محمد عبد الغفار:
هو التخفي ده كان عشان علة معينة.. وهي إني مكنتش في مرحلة تسمح بإني البس هدوم حمل وفي نفس الوقت هدومي العادية مش مظبوطة عليا.. مش عشان حاجة تانية يعني :)
دي نصيحة عظيمة يا محمد بإذن الله انفذها :))

Shima: lol.. i can imagine eno hayeegi w m3ah war2a w 2alam rosas w y2olli wareeli akteb ezay ya mama.. e7m..i guess i have to wait 7abba mosh keda :)

ايام العمر:
أمال إيه.. عشان ييجي مشهور لوحده :)

لسه فعلا ما استقريناش على اسم.. لو فيه اسماء حلوة يا ريت تقولوا... كلنا آذان صاغية.. اسم يكون مؤثر كده ومش منتشر قوي (يا حبذا يعني)

geraldine:
مين يشهد للعروسة يا حبي :)))

حسام:
بيج بوس مرة واحدة.. لا يا فندم المقامات محفوظة برضه :)

وبعدين الأكل له علاقة وثيقة بالحمل.. ابتداء من مأسآة عدم هضمه في الشهور الأولى.. واشتهاؤه والفجعة في الشهور اللي في النص وانتهاء بالحموضة في الشهور الأخيرة.. الموضوع كبير كبير يعني :)

karma:
آمين :) وأدام الله الدفء

samourai 4 ever:
مممم.. عبقري جدا إن الواحد يكون دارس في موضوع تربية الأطفال.. أنا متهيألي المفروض يكون فيه منهج ثابت كل الناس تاخده في الجامعة أو محاضرات أو كورس إجباري عن التربية.. لإن كل الناس بتحتاجها..
أنا باحاول اعوض ده بالقراية الحرة.. عندي كتب حلوة قوي عن الأطفال والاهتمام بيهم وفترة الحمل وخلافه..لو عندك (وده أكيد طبعا) كتب معينة مفيدة في التربية يا ريت ترشحيهالي وأنا إن شاء الله أدور عليها واجيبها.. وربنا يرزقك بابن الحلال :)))

طائر حزين:
تعليقك خلاني مبتسمة وفرحانة قوي :)) جميل قوي شعور الأمومة ده.. الواحد فعلا بدأ يقدر أمه بشكل مختلف بعد أما دخل هو في التجربة.. أنا متشوقة قوي للبيبي ده عشان عاوزة أعمل معاه حاجات كتير.. ده أنا حتى بافكر في الكتب اللي هيقراها من دلوقت :) تعليق جميل بجد.. ربنا يكرمك :))

Ghada said...

ahmed:
ربنا يرزقك ببنت الحلال أولا وبخصوص طلبك يا سيدي خد عندك..
ترانيم تحت ظلال تمارا" لمحمد عفيفي"
فيه "ذات" لصنع الله إبراهيم
كمان "بيت الياسمين" لإبراهيم عبد المجيد
فيه كتاب كمان رائع جدا هيعرفك على كتب كتير لغادة السمان اسمه "مواطنة متلبسة بالقراءة".. الكتاب عامل زي رحلة كده في كتب كتيره عربية وأجنبية.. جميل بجد.. ولو ملقيتهوش في السوق أنا متأكدة إن فيه نسخ منه في مكتبة مبارك

dido:
ادينا بنحاول يا بنتي :) ربنا يحلي لك أيامك يا عسولة ويخلي لي وجودك الجميل ده :)

esraa hamed:
:)) ربنا يخليكي يا حبيبتي.. ادعيلي بقى كده إن ربنا يتمها على خير

واصطنعتك لنفسي:
ربنا يكرمك على الدعوة الحلوة دي :)
أنا فعلا لسه باستكشف مشاعر الأمومة دي.. وأكيد هاكتب تاني عنها بإذن الله.. وانتم اللي بتشجعوني على ده والله :) استحملوا بقى :)))

بنت بلد:
شوف داخلة تضحك إزاي! :)) ماشي يا أم مليكة هو يعني عشان أنا انتفخت حبتين (تلاتة اربعة) وعشان إنت الحمد الله ربنا قومك بالسلامة يبقى ده جزائي.. لا لا.. مكانش العشم يا حسين :)))
يا حبيبتي مدونتك كانت بتحسسني بونس فظيع ولما خلفتي حسيت إنك خليتي بيا
lol
أنا شوفت الموقع واشتركت فيه صحيح.. جميل جدا ومفيد خااالص.. متشكرين يا فندم على الترشيح.. بوسة لمليكة

حاسوياتية:
الله يكرمك يا حبيبتي ده بس من ذوقك يعني :)) هادخل مدونتك حالا أهوه :) نورتيني

anonymous:
الأخت العزيزة السودانية الحامل اللي نسيت تكتب اسمها :) اسعدني تعليقك جدا.. وشرفتيني بأول تعليق ليكي عندي بجد.. مبروك على البيبي وربنا يتمم لك بخير.. يا ترى إنت مش عاوزة تعرفي نوع الطفل دلوقت عشان عنصر المفاجأة وكده؟ انا عن نفسي ماكنتش قادرة استني أعرف! مع إن والدتي وخالاتي قالولي العكس.. بتختلف من شخص للتاني طبعا..
ربنا يكرمك يا جميلة ومتشكرة بجد على الاطراء الهايل ده اللي اتمنى إني استحق ربعه بس! :)
يا ريت المرة الجاية بقى تمضي باسمك وتشرفيني بالزيارة على طول
:)

هبه المنصوري:
يا بنتي ايه الرومانسية اللي إنت فيها دي :)))
على فكرة أنا باحب أنغام.. وكده تبقي إنت أول حد يهدي أغنية للبيبي.. شفتي بقى..
اديه بيرفص وبيشكرك اهوه! :)

lilac:
لا لا لا.. ده احنا لازم نعمل رابطة أو حزب أو حاجة كده.. رابطة حوامل في المنازل .. أو منتفخات من أجل التغيير.. ههه.. أنا سعيدة قوي بالتواصل ده.. حاسة إن مش لوحدي :)
خصوصا بعد ما المدونة الحامل الوحيدة اللي اعرفها جابت مليكة خلاص :).. سعيدة بتعليقك وماتتردديش في الكتابة تاني بقى :)

فريدة:
احم احم يعني :) ادعيله بس يطلع ابن صالح ومايطلعش عيني أنا وأبوه!

دمتي رقيقة يا فريدة :)

مستجدة:
آميـــن :)) وسعيدة بمرورك الجميل ده.. نورتيني

كرانيش:
دي صورة لطيفة جدا بخلاف إنها لما بتكون بتصرخ مش بتكون عاوزة تلفت الأنظار.. خالص.. ابسلوتلي! الحمل بيكون حاجة مجهده فعلا للجسم وكل الكلام اللي الحماوات بيقولوه عن إن الحمل دلع وفرصة للدلال على الأزواج باااطل.. هما بس كانوا حامل من فترة طويلة ونسيوا شكل الموضوع إيه!
:))


يقول أنى امرأة:
ضروري أعدي اشوف التدوينة دي بقى :)) نورتيني

romalistic:
مفيش حاجة بتيجي من غير متاعب.. أنا كنت في منتهى الرعب والفوبيا لما عرفت إن أنا حامل.. بس لما الموضوع بيمشي بتلاقي إن مش كل حاجة متعبة ومقرفة.. بالعكس فيه لحظات جميلة قوي ومشاعر طازجة وجديدة عليكي.. ده بيخليكي تجتازي أي مشاكل :)


rosa:
آميــن :) ويديم عليكي الابتسامة والرضا يا رب
:)

boody:
متشكرة جدا.. منور

حمامة:
آمين.. ادعي إنت بس! :)

ghada said...

اولا ربنا يقومك بالسلامه ان شاء الله
كلامك حلو اوى ومؤثر خصوصا لما بتتكلمى عن انكو واحد و ان حالة السعاده عندك جامده جدا
اقولك حاجه انا لما بشوف بنت اختى -هيا فى بلد تانيه و لسه ما شوفتهاش وجها لوجه - بس لما بشوف ضحكتها فى الصور او على النت بحس ان قلبى بيتخطف منى و ان هموت من الفرح فما بالك بقى لما اشوف اولادى او احس ان فى حياه تانيه بتحيا جوايا الحمل والأمومه دول احسن نعمه الحمد لله
عقبالنا كلنا
سلام مؤقت

عصفور طل من الشباك said...

مبروك عليك يا غادةربنا يجيبه أو يجيبها بالسلامة

Ayman Alagouza said...

ana tol 3omry bashkor Rabena enno 5ala2ny ragel mesh bent...w dayman kont ba7es b7asad ba3d elbanat en e7na regala w 7ayatna ashal w alaz...she2 tabi3i, lakn lamma 2aret el post da...w di awel marra 2a2ralek 7aga...7aset en...eh da?? dol ma7zozeen...el3elaka di bein el ganeen w ommo 7aga 3omrena ma 7an7esaha...bas ba3d keda eftakart 3azab el welada fa olt lnafsy la2 fawa2 keda...e7na ma7zozeen aktar ;) hahaha rabena y5aliholek w ybareklek feeh, ana bardo bakteb w barsem ya ret t2olili ra2yek fe sho3'ly ...thanks for the inspiration :)

Carol said...

شعور غريب داخل كل فتاه قابلة على الزواج أو الانجاب
لا أعرف وصفه
و لا أعرف شعور الأم
قبل الحمل هناك مزيج بين التوتر و الدهشة و حب الاستطلاع لا أعرف
لكن بكلماتك جعلتيني أبتسم لهذا الشعور

Anonymous said...

إستراتيجيه تخفى ايه يا بنتى دى اللى انتى شاغلة نفسك بيها اشغلى نفسك بس بالحالة الجميلة اللى انت عايشاها افرحى بيها وما تغيريش مؤشر إحساسك ناحية حاجات تانية غريبة المفروض انك تفخرى وتفرحى ببطنك الكبيرة دى وتنبهى بيها كمان اللى مش آخد باله منها ............بصى انا من اول ماشوفتك وانا مرتاحالك ..عشان كدة هاقوللك نصيحة موجودة فى كتاب ماحدش يعرف عنه حاجة :إذا اضطررت إلى عيش واقع ما..فمن الغباء الا تحيا هذا الواقع سعيدا. وربنا ينتعك بالسلامة...

مدونات زوجة عاشقة said...

معلش
نسيت اكتبلك عنوانى .....a-lover -wife-stories.blogspot.com انا صحبة التعليق اللى فوق

mohamed said...

من ضمن التجارب اللى ما يعرفش عنها حاجه الراجل .. الحمل
اتمنى زيارة مدونتى ونبقى اصحاب
mobkhat.blogspot.com

نور said...

مبروك يا غاده
ربنا يقومك بالسلامه
احساس السعاده اللى انتى وصفاه دا انا بحسه بس لما بشوف بنت اختى الصغيره مش عارفه بقى لو بقيت حامل كده هحس ازاى
و اكيد ابنك هيبقى مبسوط اوى لما يقرا اللى انتى كاتباه دا ان شاء الله
كتاباتك معبره اوى

Eman M said...

:)))))))))
w hatsameeh eh? :)

Ghada said...

ghada:
ممم..ربنا يكون في عونك إن أختك بعيدة كده..
أنا لو كان ليا أخت بنت متهيألي مكنتش افارقها لحظة! ربنا يطمنك عليها ومنوراني :))

عصفور طل:
الله يخليكي يا حبيبتي.. ادعيلي بس
ملحوظة: فينك من زمان؟؟

ayman:
أنا ضحكت جدا على رسالتك دي.. أنا في فترة من الفترات كنت باعتبر الرجل أكثر حظا على مستويات كتيره..بس لما كبرت وعقلت كده حسيت إن الواحد عنده نزعة يصدق الكلام ده عشان يعيش احساس الضحية بقى ويلاقي شماعة يلقي عليها فشله واحباطه وحزنه.. اختلاف الأنواع لا يخلف للود قضية إذن! :)


carol:
هو فعلا شعور غريب.. سعيد على كئيب.. على توتر وخوف كده.. يعني

سيبك، يديم عليكي الابتسامة


زوجة عاشقة:
مين اللي قال إني مش باعيش الواقع بسعادة بس :) ماتقلقيش عليا يا بنتي وسعيدة بمرورك

mohamed:
معاك حق
إن شاء الله
ومنور :)

نور:
يا رب يكون مبسوط فعلا يا نور.. وميرسي يا فندم على الاطراء الجميل ده

eman m:
ما أنا عماله أقول لكم اقترحوا اسماء محدش بيقول حاجة.. خلاص إنتو احرار بقى.. بس ماحدش يلومنا لو سميناه حبظلم!
:))

Tara said...

غدغودة
انا ايضا حامل
و لاتتصوري كيف ان كتاباتك تهوّن علي ّو تخليني أحاول انظر للموضوع من زاوية ثانية
لاني اشعر اني كسلانة و غريبة عن نفسي و غير مرتاحة
اشعر انني لست أنا
مع اني كملت 3 اشهر الان لكن لم اكن اتخيل ان الوحام سيء لهذه الدرجة

شكرا على كتاباتك الحلوة
و يارب بالسلامة
و الف الف مبروك على الكتاب و ان شالله بالتوفيق دائما في كل شيء

Ghada said...

tara:
ده خبر جميل قوي :)))
وبعدين يا بنتي أنت رحتي فين وبقالك فترة مختفية.. من ساعة ما عملتي كحك العيد ومحدش عارف يكلمك :))

الـ 3 شهور الأولانيين من أسوأ الفترات اللي عدت عليا... يا ساااتر.. ده أنا تقريبا قضيتهم من غير أكل.. واحباط وعياط ونكد! الحمد لله إنهم عدوا.. الواحد كان هيتجنن!

طمنيني عليكي يا جميلة :) وبجد اتبسطت قوي إنك لسع متابعة.. ما تغيبيش علينا كده..

هاجر said...

انا متشكرة جدا علي تعليقك يا دودي وربنا يخليكي لياو معلش انا اسفة اني مش رضيت علي طول مع الاسف انا لسة شيفاها دلوقت ولسة خيبتها في البلوج فامعرفش فيه حاجةاوي

Sally said...

أولا ألف مبروك على الحمل السعيد ربنا يكملهولك بخير ان شاء الله وتفرحى بالنونو الجميل بين ايدك ربنا يباركلك فيه ويجعله ابنا بارا بكِ وبابيه واخوته ان شاء الله

ثانيا ألف مبروك على اول كتبك وان شاء الله تكملى المشوار وتبقى من اكبر كتاب مصر

دمتى بخير اختى
::سالى::

كاريزما said...

الله ياغاده على الاحساس الجميل دا
يارب تشوفيه بين ايديكى وانتى بكامل صحتك يارب
وتفرحى بيه وربنا يجعله بار بيكى وبى باباه

لحن الحب المريع said...

حلو اوى الى انتى حاسة بية انا نفسى بجد احس كدة اوى

سبمبوت said...

أنا سارة من الكويت
كتبت عنك في مدونتي .. زوريني وتفقدي نفسك :)

http://sebamboot.blogspot.com/2009/02/blog-post_14.html

Anonymous said...

福~
「朵
語‧,最一件事,就。好,你西...............................................................................................................................-...相互
,以讓>它使...................