Sunday, June 13, 2010

داخلي خواء.. وكأنني لو مر الهواء مني سأسمع له صفير

Thursday, June 10, 2010

محاولات

قصيت شعري..
نزلت محل اتنين ونص واشتريت حاجات صغيرة مش مهمة لحد ومالهاش لازمة..
رحت المكتبة واشتريت كتب وقريتها..
لبست هدوم جميلة وحطيت ماكياج حلو..
جبت لنفسي ورد..
استحميت..
شفت فيلم حلو بتوصية من حد باحبه..
صليت..
قعدت مع أصحابي..وضحكنا..
اشتغلت..
خرجت مع جوزي وشربنا عصير قصب..
لعبت مع القط بتاعي..
شغلت مزيكا عالية باحبها وغنيت بصوت عالي زي المجانين..
نمت في حضن تميم..
طب ايه؟ ليه مش لاقية بداية ولا نهاية لأم السحابة السودا اللي معششة في قلبي دي!

Saturday, June 05, 2010

وتتلاقي الوشوش مرتين


شفتك النهاردة في نفس الشارع بعد عشرين سنة..
عرفتك على طول.. من مشيتك.. وتدويرة وشك.. وصوابعك الطويلة الرفيعة..

حاجة جوايا خليتني أبص ناحيتك كأني كنت حاسة إني هاشوفك..أنا أصلا بقالي كام يوم بافكر فيك أصلي كنت باقلب في الصور القديمة ولقيت صورة لينا سوا.. شفتك..حسيت إن ربنا بيكافئني على كام يوم تفكير فيك.. شفتك.. فروة راسي نملت! ارتبكت وحسيت كإني رجعت بنت في ثانوي تاني..

إنت كمان شفتني..ثبتت نظرك عليا ثواني.. عينيك الواسعة العميقة الغامقة دي اخترقتني.. انصهرت أنا.. ابتسمت نص ابتسامة كإني باقولك أيوة أنا! ازيك؟ عامل ايه؟ بتشتغل فين؟ اتجوزت؟ خلفت؟ مبسوط؟ نفسي تكون مبسوط..مراتك حلوة؟!

بس إنت على الأرجح معرفتنيش.. دورت وشك بسرعة وكملت طريقك.. يمكن عشان أنا تخنت شوية.. واتحجبت.. ويمكن كمان عشان كنت جاره العيال ورايا وشايلة أكياس الخضار.. بقى عندي ولدين وبنت.. اللي انت شفتهم معايا دول كانوا الولدين التوأم .. أما البنت فكنت سايباها عند ماما لحد ماجيب الولاد من المدرسة.. فاكر إنت ماما طبعا لما كانت بتقفشنا بنتكلم على التليفون بالساعات..

يعني.. أكيد مش دي آخر صورة فاكرها عني..معذور لو معرفتنيش.. بس إنت على فكرة شكلك زي ما هو..

يا ترى لسه بتحب المزيكا الحلوة؟ ولا دقنك اللي طولت دي منعتك من سماعها؟
يا ترى لسه فاكر رقم تيلفوني؟ أنا لسه حافظة رقمك على فكرة.. تحب اسمعهولك؟
يا ترى عملت ايه في الكتب اللي قريناها سوا؟ أنا سبتها ف البيت القديم.. جوزي ما بيحبش الكتب.. بيقول عليها بتكركب الدنيا وتلم التراب..

أنا كمان معادش عندي وقت.. ما بين الواد علاء وأيمن وسارة وجوزي والطبيخ والشغل.. يا دوبك أقرا سورة الكهف يوم الجمعة..
أصلها بتحمي البيت من الشيطان وبتطرد العفاريت.

عفاريت؟ فاكر لما قلت لك إن ماما بتقول على الأغاني اللي كنا بنسمعها عفاريت..هيهيهي.. طب أعمل ايه؟ ما هي اللي طالعالي من زمن نجاة الصغيرة وعبد الحليم.. ما استوعبتش أبدا إن يكون فيه أغنية اسمها

Scream
تلات ارباعها صريخ.. أعمل ايه ما هو ذنبك إنك عرفتني ع المزيكا العنيفة دي.. بس أنا كمان عرفتك على إذاعة البرنامج الأوروبي أيام برنامج هالة حشيش.. إنت عارف إني كلمتها مرة واهديت لك أغنية بعد ما موضوعنا خلص؟ أكيد ما سمعتهاش.. لإنك أكيد كنت هاتعيد التفكير في كل حاجة كانت بيننا بشكل مختلف..أنا حتى سجلت المكالمة على شريط بس مش عارفة ليه!

مممم... وأنا اللي عملت نفسي جدعة وقلت كل حاجة بيننا خلصت خصوصا لما عزلنا وركبنا تليفون جديد في البيت الجديد.. ما كلمتكش ولا قلتلك على مكاني ورقمي الجديد في الدنيا.. حصنت نفسي جامد من فكرة إني اشوفك أو اسمع صوتك وقلت انتهينا.. أمال ليه اتلخبطت كده لما شفتك النهاردة وبعد عشرين سنة؟

أصلا أصلا.. أكيد إنت مش إنت ولا أنا أنا.. الوقت بيغير.. أكيد إنت بقيت شخصية كريهة جدا..وأكيد صوتك مبقاش حنين وبقى خشن كده ووحش .. حتى صوابعك الرفيعة اللي كنت باحبها أكيد لو أنا دققت فيها هلاقيها تخنت حبة.. أنا حتى لو شفتك في الشارع مرة تانية كمان عشرين سنة ممكن يعني.. ممكن أدور وشي الناحية التانية أصلا..