Tuesday, November 01, 2005

;) كرما لعيون بنت مصرية



وآدي إجابتي على الأسئلة اللي بعتتهالي بنت مصرية:

سبع حاجات عايزة أعملها

1-أركز في الكتابة اللي بحق وحقيق
2. آكل مع ماريان كشري عند أبو عماد (وحشتيني قوي يا بنت إنتِ)
3. أحضر محاضرة مقال لـ د/ أحمد الشامي في الكلية يكون فيها فيلم كارتون
:))
4.أمشي تحت المطر على كوبري ستانلي
5.أقرا "ويطول اليوم أكثر من قرن" لـجنكيز أيتماتوف (بقالي سنة منيماها تحت المخدة كل يوم أقرا منها سطرين!)
6. أحضر حفلة لوجية عزيز
7. نفسي في حاجات كتير تانية حاطاها في صندوق مقفول ;)

سبع حاجات مش بعرف أعملها (سبعة بس؟!)

1. مش باعرف أنام من غير غطا حتى في عز الحر
2. مش باعرف أخاصم ماما
3. مش باعرف أنسى الناس اللي مشيوا
4. مش باعرف مادمعش لما أسمع كلمة حلوة وطالعة من القلب
5.مش باعرف آكل اللوبيا أم عين سودا والفاصوليا البيضا (مطلقاااااا)
6. مش باعرف أحلم بالليل غير نااادر جدا
7. مش باعرف يعدي علي يوم من غير ما اسمع الست فيروز

سبع حاجات بقولهم طول الوقت

1. ها! ولا يهمني!
2. في عينك! (تشرد وكده!)
3. وكده!!
4. كركوور (لما حد يكون دمه خفيف زيادة)
5. أصلا أصلا
6. يا سلاااام
7. عودة الندل (لما بادخل المكتب الصبح!)

سبع أشخاص اطلب منهم يلعبوا اللعبة دى
بالترتيب الأبجدي

1. الباحثة عن الحرية
2.بحر
3. تهاويم
4. حدوتة
5. ديدو
6. فوضى مشاعر
7. نفسي

21 comments:

hesterua said...

على فكرة مش عارف ليه حاسس ان اغلب المدونين ذوقهم واحد وهوايتهم واحدة
مش عارف ليه؟
ممكن عشان اغلبهم ولاد مدرسة واحدة
يمكن عشان ثقافة واحدة
جايز

Tarek said...

Maskhara "Karkour" fe3lan. :)

Bent Masreya said...

تسلملى عويناتك يا غدغود
:)
كل سنة وانتى طيبة
عيد سعيــــــ:)ــــد

KING TOOOT said...

أحلام جوه فى صندوق مقفول
بس الأحلام مش عايزة رسول
علشان خارجة من روح فنان
لازم توصل بدون ستأذان
و تبوح
و تقول
على كل أللى ف مشاعرنا كمان
على كل أمانى عشناها زمان
على كل أمل حرّك أنسان
كان يوم مقتول
KING TOOOT

shady said...

فعلاً اللوبيا أم عين سودا والفاصوليا البيضا شئ بشع

Tara said...

بصراحة
انا جيت اقول لك كل سنة وانتي طيبة يا غادة

Ghada said...

د/ زيفاجو:
ماعتقدش إن كلهم ذوقهم واحد .. يمكن تكون فيهم حتة "وحدوية" كده..بطبيعة الحال يعني..

طارق:
يعني بقى وكده!

بنت مصرية:
وإنت طيبة يا جميلة.. عيد سعيد عليكِ وعلى كل اللي عندك
:))

كينج تووت:
كل سنة وإنت طيب يا ملك! .. بجد مش عارفة أقول لك إيه .. إنت الفنان مش أنا!

شادي:
أهلا بيك في نادي أعداءاللوبيا .. عضوية ذهبية كمان!

تارا:
بصراحة إنتي جميلة قوي يا تارا! كل سنة وإنت بألف صحة وسعادة
:)

دوحا said...

عيد مبارك ونظيف وشريف

و مليان سرور وكمال وجمال


مع تحيات الحزب الوطنى

taty said...

انا كمان مش بعرف انام من غير غطا حتى في عز الصيف بس بحب اللوبيا قوي
كل سنه و انت طيبه يا غاده

Ahmed Shokeir said...

حلوة أوي حكاية أمشى تحت المطر دي .. فعلا متعة

واضح إنك بتعزي الدكتور أحمد الشامي أوى

Lasto-adri *Blue* said...

غادة وحشانى .. ووحشنى قراية البلوج بتاعك مع كباية الشاى بتاعتى الصبح بدرى

ياااا يا بنوتة... كانت أيام

Ghada said...

taty:
ممكن أعزمك على لوبيا.. **ضحكة شريرة**..بيقولوا إن ماما بتعملها تحفة..
:)

أحمد شقير:
أكيد بعز د أحمد جدا جدا .. دي المحاضرة بتاعته كنت باعتبرها فسحة! وكفاية إن المادة بتاعته كنت باجيب فيها امتياز... هييييه أيام!

لست أدري:
حمد الله على السلامة يا لست.. إنت كمان واحشاني قوي.. كنت مستخبية فين ده كله يا بنتي؟
البلوج نور..
هامش: أنا كمان بشرب شاي
:)

المصري said...

سبع حاجات عايز اعملها ؟
1- اكتب رواية 11 سبتمبر ( بقالي سنة عايز اكتبها يا جدعان)
2- اروح السيدة زينب واقعد علي قهوة الفيشاوي ( بس من غير شيشة)
3- بقالي سنتين نفسي ازور المتحف المصري واقعد اجل في الزياة لغاية لما تيجي مشاغل
4- اصحي في يوم بدري قبل الفجر اشوف اليوم في مصر يبتدي ازاي
5- انتخب واحد ويكسب( في اي انتخابات حتي انتخابات الاهلي كسب حسن حمدي!!!!)
6- اكل المارون جلاسيه ( تصدقوا مش عارف يطلع ايه؟)
7- اتفرج علي فيلم الطيب والشرس والقبيح من اوله لاخره من غير مقاطعة


سبع حاجات مش عارف اعملها
1- اني اقف في وسط الشارع واقول يسقط الفساد من غير خوف

2- اروح العراق !!!!
3- اقرا كل المدونات
4- انا بقي بكره البسلة والباذنجان والمسقعة والمحاشي بكافة انواعها ( حاجة تسد النفس)
5- نفسي ا سمع مقطوعة موتسارت ومبلاقيش وقت
6- اروح اسافر جزر القمر !!!
7- لازم اسمع انغام او ذكري
( بحبها اكتر من فيروز )

سبع حاجات بقولها طول الوقت؟:
1- قشطة!
2- يا نهار لونه شحلقي !!!
3- استغفر الله العظيم ( غالبا في طابور)
4- مساء الفل
5- افرد كده وكرمش علي بني ادم
6- هي هي هي دمك يلطش
7- قول والله العظيم ؟ - بجد ؟ -
لا يا شيخ ؟ - هاهاهاهاها ؟ !!!
( بيتقالوا ورا لما تسمع خبر عبيط علي غرار ان الحكومة حتبقي محايدة في الانتخابات) مع الرقص علي طريقة سعيد صالح في العيال كبرت وهو بيسمع خطبة احمد زكي الشهيرة ( الوقت ليس في صالحنا... ولو باستخدام القوة المسلحة)

معلهش طولت عليكم وعزمت نفسي علي حاجة مش بتاعتي لكن تقول ايه بقي ؟
تاااااا بااااا تااااااااااه !!!

Mohammed Sameer said...

ايه يا عم المصرى

ماتروح تعمل لنفسك مدونة و تكتب فيها زى ما انت عايز!

Raed said...

إني امرؤ ابتليت بحب الكتب وإن لم أقرأها.. سأسعى جاهداً للعثور على الكتاب القابع بأسفل رأسك كل ليلة ..

ومن يدري؟ علي أفرغ منه قبلك..


تحية عطرة لهذه المدونة و صاحبتها.

sandoo said...

والله العضيم مش تطفل ولا رمى جته ولا اى حاجة من دى بجد بجد محتاج جدا اعرف حد زيك او شبه اللى شبهك وزى ما بيقول hesterua اللى انا هابعتله كمان زى ما نكون كلنا فصل فى مدرسة ادعو كل اللى هايقرا يدخل على بلوجى الجديد ويقول رايه انا اسمى محمد على فكرة وصناديلى كمان

Ahmad said...

تاريخ النهاردة 19\1\2007
يعني بعد يووم من خطوبتي كالمعتاد دخلت على مدونتي وبعدين على مدونة الباشق"اللي كان عاوز جاتوه" وبعدين لقيت نفسي هنا
أتمنى ما تكونيش من الناس اللي بيتبعتلهم على الايميل كل ما حد يكتب تعليق
لأني نفسش التعليق دا يتشاف بعدييين قوي وصدفة
سعيد جدا وشاكر ليكم جدا جدا جدا
نصيحة صادقة ما تسموش ابنكم فاروق حتى لو فاروق مات!
سلامات

Anonymous said...

Wonderful and informative web site. I used information from that site its great. » » »

Anonymous said...

福~
「朵
語‧,最一件事,就。好,你西...............................................................................................................................-...相互
,以讓>它使...................

افلام اون لاين said...

مشكووووووووووووور

اغانى شعبى said...

حلوة جدا